സൈന നെഹ്വാളിന്റെ ലുക്കിലുള്ള പരിനീതി ചോപ്രയുടെ ചിത്രം ഏറ്റെടുത്ത് സോഷ്യല് മീഡിയ. സൈന തന്നെയാണ് പരിനീതിയുടെ ചിത്രം സോഷ്യല് മീഡിയ വഴി പങ്കുവെച്ചിരിക്കുന്നത്. ബാഡ്മിന്റണ് താരമായ സൈന നെഹ്വളിന്റെ ബയോപികില് അഭിനയിക്കുകയാണ് ഇപ്പോള് പരിനീതി. ചിത്രത്തിന്റെ ഷൂട്ടിംഗ് ആരംഭിച്ചത് കഴിഞ്ഞ വര്ഷമായിരുന്നു. സൈനയുടെ ലുക്കിലെത്തുവാന് വേണ്ടി പരിനീതി ഒരുപാട് പരിശ്രമിക്കേണ്ടി വന്നു. സിനിമയുടെ പ്രഖ്യാപനം മുതല് തന്നെ പരിശീലനത്തിലാണ് താരം. ബയോപിക് ആയതുകൊണ്ടു തന്നെ താരം കടന്നു വന്ന കടമ്പകളും കരിയറിലെ നാള്വഴികളുമെല്ലാം ഇതിലൂടെ എടുത്തു കാട്ടുന്നു.
ചിത്രത്തിനായി പരിനീതിയെ ബാഡ്മിന്റണ് പരിശീലിപ്പിക്കാനായി ഒരു മികച്ച ഫിസിയോ ടീമിനെയും ലോകോത്തര കളിക്കാരെയും അണിയറ പ്രവര്ത്തകര് ഒരുക്കിയിരുന്നു. എന്നാല് ചിത്രീകരണത്തിനിടെ പരിനീതിയുടെ തോളിന് പരിക്കേറ്റിരുന്നു. എന്നാല് മുംബൈയിലെ രാംഷെത്ത് താക്കൂര് ഇന്റര്നാഷണല് സ്പോര്ട്സ് കോംപ്ലക്സില് പരിക്കിന് ശേഷവും പതിനഞ്ച് ദിവസത്തോളം താരം ബാഡ്മിന്റണ് പരിശീലിച്ചിരുന്നു. ഇന്ത്യയുടെ അഭിമാന താരമാണ് സൈന നെഹ്വാള്. ഇന്ത്യയുടെ അയണ് ബട്ടര്ഫൈ്ള എന്നാണ് സൈനയെ വിശേഷിപ്പിക്കുന്നത്. ഒളിമ്പിക്സില് മെഡല് നേടുന്ന ആദ്യ ഇന്ത്യന് ബാഡ്മിന്റണ് താരമാണ് സൈന നെഹ്വാള്.
കൂടാതെ ലോക ബാഡ്മിന്റന് റാങ്കിങ്ങില് രണ്ടാം സ്ഥാനത്തെത്തുന്ന ആദ്യ ഇന്ത്യന് താരം കൂടിയാണ് സൈന. ഒളിംപിക്സില് ബാഡ്മിന്റന് സിംഗിള്സില് ക്വാര്ട്ടര് ഫൈനലിലും സെമിഫൈനലിലും എത്തുന്ന ആദ്യത്തെ ഇന്ത്യന് താരം, വേള്ഡ് ജൂനിയര് ബാഡ്മിന്റന് ചാമ്പ്യന്ഷിപ്പ് നേടിയ ആദ്യത്തെ ഇന്ത്യക്കാരി എന്നീ ബഹുമതികളും താരത്തിനുണ്ട്. ഇന്ത്യയില് ബാഡ്മിന്റല് രംഗത്തേക്കുളള സൈനയുടെ വരവ് രാജ്യത്തിന്റെ അഭിമാനത്തെ ഉയര്ത്തി പിടിക്കാന് ഏറെ സഹായകമായി. പതിനാറ് അന്താരാഷ്ട്ര കിരീടങ്ങള് താരം കരസ്ഥമാക്കിയിട്ടുണ്ട്.
