ന്യൂഡല്‍ഹി: നിയമസഭാ തെരഞ്ഞെടുപ്പ് നടന്ന ബിഹാറില്‍ ഉള്‍പ്പെടെ ബിജെപി നേതൃത്വം നല്‍കുന്ന എന്‍ഡിഎ മുന്നേറ്റത്തിലേക്ക് കുതിക്കുമ്പോള്‍ കോണ്‍ഗ്രസ് നേതാവ് രാഹുല്‍ ഗാന്ധിയുടെ മൗനം രാഷ്‌ട്രീയ കേന്ദ്രങ്ങളില്‍ ചര്‍ച്ചയാകുന്നു. ഫലങ്ങള്‍ പുറത്തുവരുമ്പോള്‍ രാഹുല്‍ പൂര്‍ണമായി മൗനത്തിലായിരുന്നു. സാധാരണയായി രാഷ്‌ട്രീയ വിഷയങ്ങളില്‍ പ്രതികരണം നടത്താറുളള അദ്ദേഹത്തിന്റെ ട്വിറ്റര്‍ അക്കൗണ്ടും ചലിച്ചില്ല. വോട്ടെണ്ണലിന്റെ തലേന്ന് വരെ രാഹുലിന്റെ ട്വിറ്റര്‍ അക്കൗണ്ട് സജീവമായിരുന്നു.
എക്‌സിറ്റ് പോള്‍ ഫലങ്ങളുടെ ആത്മവിശ്വാസത്തിലായിരുന്നു വോട്ടെണ്ണല്‍ ദിനത്തില്‍ രാവിലെ വരെ കോണ്‍ഗ്രസ് എന്നാണ് വിവരം. തൂക്കുസഭ നിലവില്‍ വന്നാല്‍ എംഎല്‍എമാര്‍ മറുകണ്ടം ചാടുന്നത് തടയാനുളള പദ്ധതികള്‍ അടക്കം കോണ്‍ഗ്രസ് നേതൃത്വം ആസൂത്രണം ചെയ്തിരുന്നു. എന്നാല്‍ വോട്ടെണ്ണലിന്റെ ആദ്യ മണിക്കൂറുകള്‍ക്ക് ശേഷം എന്‍ഡിഎ വ്യക്തമായ മുന്നേറ്റമുണ്ടാക്കി തുടങ്ങിയതോടെ കോണ്‍ഗ്രസിന്റെ അണിയറ നീക്കങ്ങള്‍ നിശ്ചലമായി. ഫലപ്രഖ്യാപനത്തിന്റെ ഒരു ഘട്ടത്തിലും രാഹുലിന്റെ പ്രതികരണം ഉണ്ടായില്ലെന്നതും രാഷ്‌ട്രീയ വൃത്തങ്ങളില്‍ കൗതുകമുണര്‍ത്തി.
ഉപതെരഞ്ഞെടുപ്പ് നടന്ന യുപിയില്‍ അടക്കം ഹത്രാസ് വിഷയവും കാര്‍ഷിക ബില്ലുകളും ഉയര്‍ത്തിക്കാട്ടി ബിജെപിക്കും എന്‍ഡിഎയ്‌ക്കുമെതിരേ രാഹുല്‍ വലിയ പ്രചാരണമാണ് നടത്തിയത്. സഹോദരി പ്രിയങ്കയുമൊന്നിച്ച് ഹത്രാസിലേക്ക് രാഹുല്‍ നടത്തിയ യാത്ര ഉള്‍പ്പെടെ തെരഞ്ഞെടുപ്പില്‍ സജീവ ചര്‍ച്ചയാക്കാന്‍ കോണ്‍ഗ്രസ് പരിശ്രമിച്ചിരുന്നു. എന്നാല്‍ തെരഞ്ഞെടുപ്പ് സമയത്ത് കോണ്‍ഗ്രസും രാഹുലും കളിച്ച ജാതിരാഷ്‌ട്രീയം ജനങ്ങള്‍ തിരിച്ചറിഞ്ഞുവെന്നാണ് ഫലം വ്യക്തമാക്കുന്നത്.
ബിഹാറിലും ഇതേ വിഷയങ്ങള്‍ ഉയര്‍ത്തിക്കാട്ടി രാഹുലായിരുന്നു കോണ്‍ഗ്രസിനെ പ്രതിനിധീകരിച്ച് പ്രചാരണത്തിന് നേതൃത്വം നല്‍കിയത്. എന്നാല്‍ മഹാസഖ്യത്തിലെ കോണ്‍ഗ്രസിന്റെ പ്രകടനം അതിദയനീയമായിപ്പോയെന്നാണ് രാഷ്‌ട്രീയ നിരീക്ഷകര്‍ വിലയിരുത്തുന്നത്.
യുപിയില്‍ ഇത്രയേറെ രാഷ്‌ട്രീയ വിവാദങ്ങള്‍ ഉണ്ടാക്കിയിട്ടും കോണ്‍ഗ്രസിന് നിലംതൊടാനായില്ലെന്നതാണ് ശ്രദ്ധേയം. ഉപതെരഞ്ഞെടുപ്പ് നടന്ന ഏഴ് മണ്ഡലങ്ങളിലുമായി 36.73 ശതമാനം വോട്ടുകള്‍ ബിജെപി നേടിയപ്പോള്‍ കോണ്‍ഗ്രസിന് ലഭിച്ചത് 7.53 ശതമാനം വോട്ടുകള്‍ മാത്രമാണ്. ആറ് മണ്ഡലങ്ങളിലും ബിജെപി വിജയിക്കുകയും ചെയ്തു. ഗുജറാത്തിലും കര്‍ണാടകയിലുമടക്കം ഉപതെരഞ്ഞെടുപ്പ് നടന്ന മറ്റ്
മണ്ഡലങ്ങളിലും കോണ്‍ഗ്രസിന്റെ സ്ഥിതി ഇതിനോട് സമാനമാണ്. 28 മണ്ഡലങ്ങളില്‍ ഉപതെരഞ്ഞെടുപ്പ് നടന്ന മദ്ധ്യപ്രദേശില്‍ മാത്രമാണ് വോട്ട് വിഹിതത്തില്‍ വലിയ തകര്‍ച്ചയില്ലാതെ കോണ്‍ഗ്രസ് പിടിച്ചുനിന്നത്.
