തിരുവനന്തപുരം: സംവിധായകൻ ശാന്തിവിള ദിനേശിനെതിരെ വീണ്ടും പരാതിയുമായി ഡബ്ബിംഗ് ആർട്ടിസ്റ്റ് ഭാഗ്യലക്ഷ്മി. തനിക്കെതിരെ അപവാദ പരാമർശമുള്ള വീഡിയോ യൂട്യൂബിൽ പങ്കുവച്ചെന്ന് കാണിച്ചാണ് പരാതി. മുഖ്യമന്ത്രിക്കും ഡിജിപിക്കുമാണ് പരാതി നൽകിയത്.
സൈബർ ക്രൈം പോലീസ് പരാതിയിൽ കേസെടുത്തു. ഭാഗ്യലക്ഷ്മിയുടെ മൊഴിയെടുക്കുകയും ദിനേശിനെ വിളിച്ചുവരുത്തി പോലീസ് താക്കീത് നൽകുകയും ചെയ്തു. സമൂഹമാദ്ധ്യമങ്ങളിലൂടെ അപമാനിച്ചുവെന്ന് ആരോപിച്ച് മറ്റൊരു യൂട്യൂബറായ വിജയ് പി നായരെ കയ്യേറ്റം ചെയ്ത കേസിൽ ജാമ്യത്തിലാണ് ഭാഗ്യലക്ഷ്മി.
നേരത്തെ ശാന്തിവിള ദിനേശനെതിരെ ഭാഗ്യലക്ഷ്മി നൽകിയ പരാതിയിൽ പോലീസ് കേസെടുത്തിരുന്നു. സമൂഹമാദ്ധ്യമങ്ങളിലൂടെ തന്നെ പല തവണ അധിക്ഷേപിക്കുന്നതായി ഭാഗ്യലക്ഷ്മി പരാതിയിൽ ആരോപിച്ചിരുന്നു.
