പെട്രോൾ പമ്പുകളിൽ മൊബൈൽ ഫോൺ ഉപയോഗിക്കരുത് എന്ന മുന്നറിയിപ്പ് ബോർഡുകൾ നമ്മൾ കാണാറുണ്ട്. പെട്രോൾ പമ്പിനുള്ളിൽ മൊബൈൽ ഉപയോഗിച്ചാൽ പൊട്ടിത്തെറി ഉണ്ടാകുമെന്ന് പലരും കരുതുന്നു. എന്നാൽ ഇത് സത്യമാണോ ? ആണെങ്കിൽ തന്നെ അതെന്തുകൊണ്ട് ? എന്നൊക്കെ ചിന്തിച്ചിട്ടുണ്ടോ ? ഇല്ലെങ്കിൽ നമുക്ക് ഒന്ന് പരിശോധിക്കാം.
നെറ്റ് വർക്ക് ടവറുകളുമായുള്ള കണക്ഷന് വേണ്ടി നിരവധി അതിസൂക്ഷ്മ വൈദ്യുതി ഘടകങ്ങൾ ആണ് നമ്മൾ ഉപയോഗിക്കുന്ന മൊബൈൽ ഫോണുകളിൽ ഉള്ളത്. വൈദ്യുതകാന്ത തരംഗങ്ങൾ വഴിയാണ് ടവറും മൊബൈൽ ഫോണും തമ്മിലുള്ള ഈ ബന്ധം സാധ്യമാകുന്നത്. ഈ വൈദ്യുതകാന്ത തരംഗങ്ങൾ ഒരു പ്രത്യേക റേഡിയോ ഫ്രീക്വൻസിക്കുള്ളിലൂടെ സഞ്ചരിക്കുമ്പോൾ ആണ് കോളുകൾ കണക്ട് ആകുന്നത്. ഫോണിൽ നിന്നും വരുന്ന ഈ തരംഗങ്ങൾ തീപ്പൊരി സൃഷ്ടിക്കാനുള്ള സാധ്യതയുണ്ട്. വാഹനത്തിൽ ഇന്ധനം നിറയ്ക്കുന്ന വേളയിൽ ആണ് ഫോൺ ഉപയോഗിക്കുന്നതെങ്കിൽ ഈ തീപ്പൊരി ഇന്ധനത്തിലേക്ക് പടരാൻ ഉള്ള സാധ്യത തള്ളിക്കളയാൻ ആവില്ല. ഇത് പൊട്ടിത്തെറിക്ക് കാരണമാകും.
മൊബൈൽ റിംഗ് ചെയ്യുമ്പോൾ തന്നെ ഇത്തരത്തിലുള്ള തീപ്പൊരി ചെറിയ തോതിൽ ഉണ്ടായേക്കാം.
പെട്രോൾ പമ്പിൽ മൊബൈൽ ഫോൺ ഉപയോഗിക്കാൻ പാടില്ല എന്ന മുന്നറിയിപ്പ് നിലനിൽക്കുന്നുണ്ടെങ്കിലും പെട്രോൾ പമ്പിൽ മൊബൈൽ ഫോൺ ഉപയോഗിച്ചത് കൊണ്ട് അപകടം ഉണ്ടായതായി ശാസ്ത്രീയമായ തെളിവുകൾ നിലനിൽക്കുന്നില്ല. മൊബൈൽ ഫോണിൽ ഉപയോഗിച്ചിരിക്കുന്ന ബാറ്ററികൾ വോൾട്ടേജ് കുറഞ്ഞവ ആയതിനാൽ തീപ്പൊരി ഉണ്ടാക്കാൻ ഉള്ള കഴിവ് ഈ ബാറ്ററികൾക്ക് ഇല്ല എന്നാണ് ചില വാദങ്ങൾ. എന്നാൽ മൊബൈൽ ഫോണിൽ ഉപയോഗിക്കുന്ന കേടുവന്ന ബാറ്ററികൾ തീപ്പൊരി ഉണ്ടാക്കാൻ കാരണമായേക്കാം
എന്നിരുന്നാലും പെട്രോൾ പമ്പിനുള്ളിൽ മൊബൈൽ ഫോൺ ഉപയോഗിക്കാനുള്ള സാഹസത്തിന് ആരും തയ്യാറാവരുത്.
Comments