നാടകങ്ങളിലൂടെയും അവിടെ നിന്നും സിനിമ രംഗത്തേക്കും തുടര്ന്ന് സീരിയലുകളിലൂടേയും മലയാളി പ്രേക്ഷകരുടെ മനസ്സില് ഇടം കണ്ടെത്തിയ നടിയാണ് ശാന്താദേവി. നാടക രംഗത്ത് സജീവ സാന്നിധ്യമായിരുന്ന ശാന്താദേവി ആയിരത്തോളം നാടകങ്ങളില് തന്റെ കഴിവ് തെളിയിച്ചിട്ടുണ്ട്. 1954 ല് കുണ്ഡനാരി അപ്പു നായര് സംവിധാനം ചെയ്ത സ്മാരകം എന്ന നാടകത്തിലൂടൊണ് ശാന്താദേവി ആദ്യമായി നാടക രംഗത്തേക്ക് എത്തുന്നത്. പിന്നീട് നിരവധി വേദികളിലൂടെ ശാന്താദേവി പ്രേക്ഷകര്ക്കു മുന്നിലെത്തി. രാമു കാര്യാട്ട് സംവിധാനം ചെയ്ത് 1957-ല് പുറത്തിറങ്ങിയ മിന്നാമിനുങ്ങ് എന്ന സിനിമയിലൂടെയാണ് ശാന്താദേവി ചലച്ചിത്ര രംഗത്ത് തുടക്കം കുറിച്ചത്.
മൂടുപടം, കുട്ടിക്കുപ്പായം, കുഞ്ഞാലിമരക്കാര്, ഇരുട്ടിന്റെ ആത്മാവ്, സ്ഥലത്തെ പ്രധാന പയ്യന്സ്, അദ്വൈതം തുടങ്ങിയ ചിത്രങ്ങളിലൂടെ പ്രേക്ഷക മനസ്സില് സ്ഥാനം കണ്ടെത്തി. 480-ഓളം ചിത്രങ്ങളില് സഹ നടിയായി അഭിനയിച്ചു. തുടര്ന്ന് ടെലിവിഷന് പരമ്പരകളിലും സജീവ സാന്നിധ്യമായിരുന്നു ശാന്താദേവി. തോട്ടത്തില് കണ്ണക്കുറുപ്പിന്റേയും കാര്ത്യായനിയമ്മയുടേയും പത്തു മക്കളില് ഏഴാമത്തെ മകളായി കോഴിക്കോട് ജില്ലയിലെ പൊറ്റമ്മലിലാണ് ശാന്താദേവി ജനിച്ചത്.
ചെറുപ്പത്തില് തന്നെ മുറച്ചെറുക്കനായ ബാലകൃഷ്ണനെ വിവാഹം കഴിച്ചെങ്കിലും ആ ബന്ധം അധികനാള് മുന്നോട്ടു പോയില്ല. ഒരു കുഞ്ഞു ജനിച്ചതോടെ അദ്ദേഹം ശാന്തദേവി ഉപേക്ഷിച്ചു. പിന്നീട് പ്രശസ്ത ഗായകനായ കോഴിക്കോട് അബ്ദുല്ഖാദറെ വിവാഹം കഴിച്ചു. സുരേഷ് ബാബു, സത്യജിത്ത് എന്നിവര് മക്കളാണ്. യമനം എന്ന ചിത്രത്തിലെ അഭിനയത്തിന് 1992-ല് മികച്ച സഹനടിക്കുള്ള ദേശീയ പുരസ്കാരം നേടി. കൂടാതെ കേരള ഫിലിം ക്രിട്ടിക്സ് അസോസിയേഷന് ചലച്ചിത്ര അവാര്ഡ്, സംഗീത നാടക അക്കാദമിയുടെ പ്രേംജി പുരസ്കാരം എന്നിവ ഉള്പ്പടെ നിരവധി പുരസ്കാരങ്ങള് ലഭിച്ചിട്ടുണ്ട്. 2010 നവംബര് 20-ന് വാര്ദ്ധക്യസഹജമായ അസുഖം മൂലമായിരുന്നു അന്ത്യം.
