വേറിട്ട ശബ്ദത്തിലൂടെ ആരാധകരുടെ മനസ്സ് കീഴടക്കിയ അതുല്യ പ്രതിഭയാണ് ഉദിത് നാരായണ്‍. തൊണ്ണൂറുകളില്‍ കൗമാരക്കാരുടെ ഹൃദയം കീഴടക്കിയ മിക്ക ഗാനങ്ങള്‍ക്കും ജീവന്‍ നല്‍കിയ ഉദിത് നാരായണന്റെ ശബ്ദത്തിലൂടെ പുറത്തു വന്ന പല പ്രണയ ഗാനങ്ങളും അന്നത്തെ തലമുറയെ ഹരം കൊളളിക്കുന്നവയായിരുന്നു എന്നു തന്നെ പറയാം. അത്തരത്തിലാണ് ഓരോ ഗാനങ്ങളും യുവഹൃദയങ്ങളെ പിടിച്ചടക്കിയിരുന്നത്. തന്റെ ശബ്ദ സൗകുമാര്യം കൊണ്ട് നിരവധി ആരാധകരെ സൃഷ്ടിച്ച ഈ കലാകാരന് ഈ തലമുറയിലും ആരാധകര്‍ ഏറെയാണ്. തൊണ്ണൂറിനും രണ്ടായിരത്തിനും ഇടയില്‍ പുറത്തിറങ്ങിയ ഉദിത് നാരായണന്റെ എല്ലാ ഗാനങ്ങളും ഇന്നത്തെ തലമുറയുടേയും മനസ്സ് കീഴടക്കിയവയാണ്.
1944 ല്‍ പുറത്തിറങ്ങി കവിതാ കൃഷ്ണമൂര്‍ത്തിയും ഉദിത് നാരായണനും ചേര്‍ന്നു ഹിറ്റാക്കിയ തു ചീസ് ബഡി ഹേ മസ്ത് മസ്ത്, ഹീറോ നമ്പര്‍ വണ്‍ എന്ന ചിത്രത്തിലെ സോനാ കിത്‌ന സോനാ ഹേ എന്ന ഗാനവും ഇന്നും കോളേജുകളില്‍ നിറഞ്ഞു നില്‍ക്കുന്നവയാണ്. ടിപ്പ് ടിപ്പ് ബര്‍സാ പാനി, ബോലു ചൂഡിയാ, ഹം കോ ഹമേഷാ ചുരായേ, രാജാ കോ റാണി സേ പ്യാര്‍ ഹോഗയാ, തുടങ്ങി നിരവധി ഹിറ്റ് ഗാനങ്ങള്‍ ഉദിത് നാരായണന്റെ ശബ്ദത്തിലൂടെ പുറത്തു വന്നിട്ടുണ്ട്.
1960 ഡിസംബര്‍ ഒന്നിന് ഒരു ബ്രാഹ്മണ കുടുംബത്തിലാണ് ഉദിത് നാരായണ്‍ ജനിച്ചത്. 1980 മുതല്‍ ചലച്ചിത്ര ഗാനരംഗത്ത് സജീവമായ അദ്ദേഹം സംഗീത ലോകത്ത് അറിയപ്പെടുന്ന വ്യക്തിത്വമായി മാറി.
ഹിന്ദി, തമിഴ്, തെലുങ്ക്, കന്നട, മറാത്തി, നേപ്പാളി, സിന്ധി, മലയാളം, ഭോജ്പൂരി, ഒഡിയ, ബംഗാളി തുടങ്ങിയ ഭാഷകളിലായി ആയിരത്തിലധികം ഗാനങ്ങള്‍ ആലപിച്ചിട്ടുണ്ട്. 2009 ല്‍ ഭാരതസര്‍ക്കാര്‍ പത്മശ്രീ നല്‍കി ആദരിച്ച ഇദ്ദേഹത്തിന് മൂന്ന് തവണ ദേശീയ അവാര്‍ഡും അഞ്ച് തവണ ഫിലിംഫെയര്‍ അവാര്‍ഡും ലഭിച്ചിട്ടുണ്ട്.
