ബെംഗളുരു : കോണ്ഗ്രസിനേപ്പോലെ തങ്ങളെ ആരും വഞ്ചിച്ചിട്ടില്ലെന്ന് മുന് കര്ണാടക മുഖ്യമന്ത്രി എച്ച് ഡി കുമാരസ്വാമി. കോണ്ഗ്രസുമായുള്ള സഖ്യ സര്ക്കാര് ഏറെക്കാലത്തെ പ്രവര്ത്തനങ്ങളുടെ ഫലമായുണ്ടാക്കിയ നല്ല പ്രതിച്ഛായ കൂടി തകര്ത്തുവെന്നും കുമാരസ്വാമി ആരോപിച്ചു. മൈസുരുവില് മാദ്ധ്യമ പ്രവര്ത്തകരോട് സംസാരിക്കുകയായിരുന്നു കുമാരസ്വാമി.
12 വര്ഷത്തെ പ്രതിച്ഛായയാണ് കോണ്ഗ്രസ് സഖ്യത്തോടെ തകര്ന്നത് . കോണ്ഗ്രസുമായി സഖ്യത്തിന് തയ്യാറായിരുന്നില്ല. എന്നാല് എച്ച് ഡി ദേവഗൗഡയാണ് സഖ്യത്തിന് നിര്ബന്ധിച്ചത്. ആ തീരുമാനം പാര്ട്ടിയുടെ ശക്തി ക്ഷയിക്കുന്നതിന് കാരണമായി. വൈകാരികമായ ആ തീരുമാനമാണ് കഴിഞ്ഞ മൂന്നു തെരഞ്ഞെടുപ്പുകളില് തിരിച്ചടിയായതെന്നും കുമാരസ്വാമി പറഞ്ഞു .
പാര്ട്ടിക്കും തനിക്കും പതനത്തിനുള്ള അവസരം മാത്രമാണ് ആ സഖ്യം കൊണ്ടുണ്ടായത്. കോണ്ഗ്രസ് നേതാവ് സിദ്ധരാമയ്യയുടെ കെണിയില് വീഴുകയായിരുന്നു താനെന്നാണ് കുമാരസ്വാമി ആരോപിക്കുന്നത്. ആരും വഞ്ചിക്കാത്ത രീതിയിലാണ് കോണ്ഗ്രസ് ജെഡിഎസിനെ വഞ്ചിച്ചതെന്നും കുമാരസ്വാമി പറഞ്ഞു.
