കൊച്ചി: തദ്ദേശ തെരഞ്ഞെടുപ്പിലെ രണ്ടാംഘട്ട പോളിംഗ് 76 ശതമാനം. വോട്ടെടുപ്പ് അവസാനിച്ച ആറ് മണിക്ക് ശേഷം തെരഞ്ഞെടുപ്പ് കമ്മീഷന് പുറത്തുവിട്ട പ്രാഥമിക കണക്കുകള് പ്രകാരമാണിത്.
വയനാട്ടിലാണ് ഏറ്റവും കൂടുതല് പോളിംഗ് രേഖപ്പെടുത്തിയിരിക്കുന്നത്. 79.26 ശതമാനം. പാലക്കാട് 77.6 ശതമാനവും പോളിംഗ് രേഖപ്പെടുത്തി. കോട്ടയത്താണ് ഏറ്റവും കുറവ് 73.8 ശതമാനം. തൃശൂരില് 74.69 ശതമാനം എറണാകുളത്ത് 76.98 ശതമാനം എന്നിങ്ങനെയാണ് മറ്റ് രണ്ടിടങ്ങളിലെ പോളിംഗ്.
എറണാകുളത്ത് കൊച്ചി കോര്പ്പറേഷനില് 61.82 ശതമാനം പോളിംഗ് രേഖപ്പെടുത്തി. കൊച്ചിയിലെ നഗരസഭകളില് മികച്ച പോളിംഗാണ് രേഖപ്പെടുത്തിയത്. അഞ്ചിടങ്ങളില് പോളിംഗ് 80 ശതമാനം കടന്നു. ഏഴിടങ്ങളില് 75 ശതമാനത്തിലധികമാണ് പോളിംഗ്. മൂവാറ്റുപുഴ നഗരസഭയില് 83.91 ശതമാനമാണ് പോളിംഗ്. പെരുമ്പാവൂര് (81.16 ശതമാനം) നോര്ത്ത് പറവൂര് (80.61) ഏലൂര് (81.31) അങ്കമാലി (80.41) എന്നിങ്ങനെയാണ് പോളിംഗ് നിരക്ക്. കോതമംഗലം നഗരസഭയില് 78.84 ശതമാനവും കൂത്താട്ടുകുളം നഗരസഭയില് 79.8 ശതമാനവും പോളിംഗ് രേഖപ്പെടുത്തി.
തൃശൂര് കോര്പ്പറേഷനില് 6.42 വരെയുളള കണക്കില് 63.46 ശതമാനമാണ് പോളിംഗ്. നഗരസഭകളില് വടക്കാഞ്ചേരി 77.82 ശതമാനവും ചാലക്കുടി 77.24 ശതമാനവും പോളിംഗ് രേഖപ്പെടുത്തി. കൊടുങ്ങല്ലൂര് നഗരസഭയില് 77.85 ശതമാനമാണ് പോളിംഗ്. ഗുരുവായൂരില് 72.31 ശതമാനം പേരും വോട്ട് രേഖപ്പെടുത്തി.
അഞ്ച് ജില്ലകളിലായി 451 തദ്ദേശസ്ഥാപനങ്ങളിലെ 8116 വാര്ഡുകളിലേക്കാണ് രണ്ടാം ഘട്ടത്തില് വോട്ടെടുപ്പ് നടന്നത്. 12,643 പോളിംഗ് ബൂത്തുകളാണ് സജ്ജീകരിച്ചിരുന്നത്. 473 പ്രശ്നബാധിത പോളിംഗ് ബൂത്തുകളില് വെബ്കാസ്റ്റിംഗും ഏര്പ്പെടുത്തിയിരുന്നു.
