അഡ്ലെയ്ഡ്: ആദ്യ ടെസ്റ്റിന് മുമ്പുള്ള ത്രിദിന സന്നാഹ മത്സരത്തില് രണ്ടാം ഇന്നിംഗ്സില് ബാറ്റിംഗില് തിളങ്ങി ഇന്ത്യ. ഒടുവില് വിവരം ലഭിക്കുമ്പോള് ഇന്ത്യ 4 വിക്കറ്റ് നഷ്ടത്തില് 249 എന്ന മികച്ച നിലയിലാണ്. ആകെ 335 റണ്സിന്റെ ലീഡാണ് ഇന്ത്യയ്ക്കുള്ളത്. മധ്യനിരയുടെ ബാറ്റിംഗാണ് ഇന്ത്യയ്ക്ക് മത്സരത്തിലേക്ക് മികച്ച തിരിച്ചുവരവിന് സഹായിച്ചത്. ആദ്യ ഇന്നിംഗ്സില് ഇന്ത്യ 194ന് ഓള് ഔട്ടായെങ്കിലും ഓസിനെ 108ല് പുറത്താക്കി തിരിച്ചടിച്ചിരുന്നു.
ആദ്യ ഇന്നിംഗ്സില് തിളങ്ങിയ പൃഥ്വി ഷോ 3 റണ്സില് വീണെങ്കിലും മൂന്ന് പേര് തുടര്ച്ചയായി അര്ദ്ധ ശതകം നേടിയത് ഇന്ത്യയ്ക്ക് രണ്ടാം ഇന്നിംഗ്സില് നേട്ടമായി. 120 പന്തില് 61 റണ്സ് നേടി മായങ്ക് അഗര്വാളും 78 പന്തില് അതിവേഗം 65 റണ്സെടുത്ത ശുഭ്മാന് ഗില്ലും മികച്ച കൂട്ടുകെട്ട് തീര്ത്താണ് പുറത്തായത്. 136 പന്തില് ഇന്ത്യന് ടെസ്റ്റ് ടീമിലെ സ്ഥിരതയുടെ പര്യായമായ ഹനുമാ വിഹാരി 63 റണ്സുമായി ബാറ്റിംഗ് തുടരുകയാണ്. 71 പന്തില് 38 റണ്സെടുത്ത ക്യാപ്റ്റന് അജിന്ക്യാ രഹാനേയാണ് ഇന്ന് നാലാമതായി പുറത്തായത്. ഋഷഭ് പന്ത് 9 റണ്സുമായി ക്രീസിലുണ്ട്.
