അധികം ആളുകളും ഇഷ്ടപ്പെടുന്ന ഒരു മധുര പലഹാരമാണ് ഹൽവ . വ്യത്യസ്ത നിറത്തിലും രുചികളിലുമുളള ഹൽവകള് വിപണിയില് സജീവമായി ലഭിക്കുന്നു. എന്നാല് അവയെല്ലാം ശരീരത്തിന് എത്രത്തോളം ഗുണകരമാണെന്ന് അറിയാന് സാധിക്കില്ല. അതില് നിന്നെല്ലാം വ്യത്യസ്തമായി ബീറ്റ്റൂട്ട് കൊണ്ടുളള ഒരു ഹൽവ തയായറാക്കിയാലോ… വളരെ സ്വാദിഷ്ടവും ആരോഗ്യകരവുമായ ബീറ്റ്റൂട്ട് ഹൽവ എളുപ്പം വീട്ടില് തന്നെ തയ്യാറാക്കാവുന്നതാണ്. ഇതിനായി അരക്കിലോ ബീറ്റ്റൂട്ട് ചെറിയ കഷണങ്ങളാക്കി അരിഞ്ഞെടുക്കുക. അവ മിക്സിയിലിട്ട് ആവശ്യത്തിന് വെള്ളവും ചേര്ത്ത് നന്നായി അരച്ചെടുക്കുക. അതിനു ശേഷം വൃത്തിയുള്ള ഒരു വെള്ള തുണി ഉപയോഗിച്ച് ബീറ്റ്റൂട്ടിന്റെ നീര് പിഴിഞ്ഞെടുക്കുക.
പിന്നീട് അടി കട്ടിയുള്ള ഒരു പാത്രം എടുത്ത് അതിലേയ്ക്ക് രണ്ട് ടീസ്പൂണ് നെയ്യ്, അരിച്ചെടുത്ത ബീറ്റ്റൂട്ടിന്റെ നീര്, ഒരു കപ്പ് പഞ്ചസാര, അര ടീസ്പൂണ് ഏലയ്ക്ക പൊടിച്ചത്, നാല് ടീസ്പൂണ് കോണ്ഫ്ലവര് വെള്ളം ചേര്ത്ത് കട്ട കൂടാതെ കലക്കി എടുത്തത് എന്നിവ ചേർത്ത് നന്നായി ഇളക്കി യോജിപ്പിച്ചെടുക്കുക. അഞ്ചു മിനിറ്റോളം ഇവയെല്ലാം നന്നായി ഇളക്കി കൊടുക്കുക. പിന്നീട് അടുപ്പ് ഓണ് ചെയ്ത് ഇവ നന്നായി കുറുക്കിയെടുക്കുക. ഇതിലേക്ക് അണ്ടിപ്പരിപ്പ്, ബദാം, പിസ്ത എന്നിവ ചേര്ത്ത് കൊടുക്കുക ശേഷം നന്നായി ഇളക്കി യോജിപ്പിക്കുക.
മിശ്രിതം നന്നായി കട്ടിയായ ശേഷം ഒരു ചെറിയ പാത്രത്തില് ഒഴിച്ചു കൊടുക്കുക. പാത്രത്തില് നിന്നും വിട്ടുവരുന്നുണ്ടെങ്കില് പാകമായി എന്ന് കരുതാം. ശേഷം തീ ഓഫ് ചെയ്ത് ഏത് ആകൃതിയിലാണ് ഹലുവ തയ്യാറായി കിട്ടേണ്ടത് ആ ആകൃതിയിലുള്ള പാത്രമെടുത്ത് അതിനുള്ളില് നെയ്യ് തൂവി അതിലേക്ക് ഈ മിശ്രിതം ഒഴിച്ച് സെറ്റാക്കുക. തണുത്ത ശേഷം മുപ്പത് മിനിറ്റ് ഫ്രിഡ്ജില് വയ്ക്കുക. പിന്നീട് ഫ്രിഡ്ജില് നിന്ന് പുറത്തെടുത്ത് മറ്റൊരു പാത്രത്തിലേയ്ക്ക് മാറ്റാവുന്നതാണ്. വളരെ സ്വാദിഷ്ടവും ആരോഗ്യകരമായ ബീറ്റ്റൂട്ട് ഹലുവ തയ്യാര്. കുട്ടികളും മുതിര്ന്നവരും ഒരുപോലെ ഇഷ്ടപ്പെടുന്ന ഒരു വിഭവമാണിത്.
Comments