ദൂരയാത്രകള്‍ ഇഷ്ടപ്പെടാത്തവര്‍ കുറവാണ്. കൂടാതെ അവധി ദിവസങ്ങളില്‍ റിസോര്‍ട്ടിലും ഹൗസ് ബോട്ടുകളിലുമായി കറങ്ങുന്നവരും കുറവല്ല. എന്നാല്‍ അതില്‍ നിന്നെല്ലാം വ്യത്യസ്തമായി നഗരത്തിന്റെ തിരക്കുകളില്‍ നിന്നും മാറി താമസിക്കാന്‍ പറ്റിയ ഒരിടമുണ്ട്.
തൃശ്ശൂരില്‍ ചാലക്കുടി പുഴയോട് ചേര്‍ന്നാണ് ഈ കോട്ടേജ് സ്ഥിതി ചെയ്യുന്നത്. 2011 ഏപ്രിലില്‍ ആരംഭിച്ച ഇവിടം പ്രകൃതിയോട് അടുത്ത നില്‍ക്കുന്ന ഒന്നാണ്. ഈ കോട്ടേജുകളുടെ ഏറ്റവും വലിയ പ്രത്യേകതയും അതുതന്നെയാണ്. ഓരോ അഞ്ച് സെന്റ് സ്ഥലത്തായിട്ടാണ് കോട്ടേജുകള്‍ ഒരുക്കിയിട്ടുള്ളത്. വര്‍ഷങ്ങളോളം പഴക്കമുള്ള ആലുകളും നിരവധി ഔഷധസസ്യങ്ങളും ചുറ്റിലും നിറഞ്ഞു നില്‍ക്കുന്നു. എന്നാല്‍ അവിടുത്തെ ഏറ്റവും പ്രത്യേകത അവിടെയുളള അടുപ്പമില്ലാത്ത റസ്റ്റോറന്റും വേവിക്കാത്ത ബിരിയാണിയുമാണ്.
കേള്‍ക്കുമ്പോള്‍ വ്യത്യസ്തമായി തോന്നുമെങ്കിലും വളരെ സ്വാദിഷ്ടമാണ് ഇവിടെയുളള വേവിക്കാത്ത സ്‌പെഷ്യല്‍ ബിരിയാണി. സ്വാദിഷ്ടം എന്നതിലുപരിയായി ആരോഗ്യത്തിന് ഏറെ ഗുണപ്രദമാണ് ഈ ബിരിയാണി. ഇവിടെ അരിക്കു പകരമായി അവില്‍ ആണ് ഉപയോഗിക്കുന്നത്. ഇഞ്ചി വെളുത്തുള്ളി എന്നിവയും പച്ചക്കറികളും അരിഞ്ഞു ചേര്‍ത്തിരിക്കുന്നു. സാധാരണ ബിരിയാണിയില്‍ ചേര്‍ക്കുന്ന കൂട്ടുകളെല്ലാം ഉള്‍പ്പെടുത്തിയിട്ടുണ്ട്. എന്നാല്‍ അവയൊന്നും വേവിച്ചവയല്ല എന്നു മാത്രം.
ഇതിനോടൊപ്പം നെല്ലിക്ക ചമ്മന്തിയും, നെല്ലിക്ക ഉപ്പിലിട്ടതും ചുവന്നുള്ളിയും ചേര്‍ത്ത് ചതച്ചതും, കപ്പലണ്ടിയും തേങ്ങകൊത്തും ഉപ്പും കുരുമുളകും ഇട്ട് മിക്‌സ് ചെയ്തതും, വേവിക്കാത്ത കോളിഫ്‌ളവര്‍ കൊണ്ടുണ്ടാക്കിയ കറിയും, കരിക്കു പായസവും, കൈതച്ചക്ക, പപ്പായ, ആപ്പിള്‍, പേരയ്‌ക്ക തുടങ്ങിയവ പഴങ്ങള്‍ ചേര്‍ത്ത് ഫ്രൂട്ട് സാലഡും ലഭ്യമാണ്. ഇവയെല്ലാം ഉള്‍പ്പെടുന്ന ഒരു ബിരിയാണിയുടെ വില നൂറു രൂപയാണ്. നെല്ലിക്കയിട്ട് തിളപ്പിച്ച വെള്ളമാണ് ഇവിടെ കുടിക്കാനായി നല്‍കുന്നത്. ഭക്ഷണം വിശപ്പ് മാറ്റാന്‍ മാത്രമല്ല ആരോഗ്യ സംരക്ഷണത്തിന് കൂടിയാണ്. അതുകൊണ്ടു തന്നെ ഉണ്ടാക്കുന്ന വേവിയ്‌ക്കാത്ത ഭക്ഷണങ്ങള്‍ എല്ലാം തന്നെ വളരെ ശ്രദ്ധയോടെയാണ് തയ്യാറാക്കുന്നത്. എല്ലാത്തിലും ഇന്തുപ്പാണ് ഉപയോഗിക്കുന്നത്.
