നിരവധി ആരോഗ്യ ഗുണങ്ങള് അടങ്ങിയ ഒന്നാണ് നെല്ലിക്ക. ഔഷധ ഗുണങ്ങള് ഏറെയാണെങ്കിലും പച്ചനെല്ലിക്ക കഴിക്കുക എന്നത് കുറച്ചു ബുദ്ധിമുട്ടുള്ള കാര്യമാണ്. സാധാരണയായി അച്ചാറിട്ടും ഉപ്പിലിട്ടുമെല്ലാം നാം നെല്ലിക്ക കഴിക്കാറുണ്ട്. എന്നാല് അതില് നിന്നെല്ലാം വ്യത്യസ്തമായി നെല്ലിക്ക കൊണ്ട് ഒരു കറി ഉണ്ടാക്കിയാലോ …വളരെ സ്വാദിഷ്ടവും ആരോഗ്യകരവുമായ ഒരു നെല്ലിക്ക കറി തയ്യാറാക്കുന്നത് എങ്ങനെയെന്നു നോക്കാം. ഇതിനായി ആദ്യം പത്ത് നെല്ലിക്ക എടുത്ത് നന്നായി കഴുകി കുരു കളഞ്ഞ് കഷണങ്ങളാക്കി അരിഞ്ഞു വയ്ക്കുക. അതിലേയ്ക്ക് കാല് ടീസ്പൂണ് ഉപ്പും ,അര ടീസ്പൂണ് മുളകുപൊടിയും, കാല് ടീസ്പൂണ് വിനിഗറും ചേര്ത്ത് നന്നായി യോജിപ്പിച്ച് പത്ത് മിനിറ്റ് മസാല പിടിക്കാനായി മാറ്റിവെക്കുക.
അതിനു ശേഷം ഒരു ചീനച്ചട്ടിയില് രണ്ടു സ്പൂണ് വെളിച്ചെണ്ണ ഒഴിച്ച് അതിലേക്ക് ഒരു സ്പൂണ് ചെറുതായി അരിഞ്ഞു വെച്ച ഇഞ്ചി, ചെറിയ ഉള്ളി അരിഞ്ഞത് ഒരു പിടി, രണ്ട് പച്ചമുളക്, കറിവേപ്പില എന്നിവ ചേര്ത്ത് നന്നായി മൂപ്പിച്ചെടുക്കുക. ഇത് നന്നായി മൂത്തുവരുമ്പോള് ഇതിലേയ്ക്ക് കാല് ടീസ്പൂണ് മഞ്ഞള്പ്പൊടി ,അര ടീസ്പൂണ് മുളകുപൊടി ,ആവശ്യത്തിന് ഉപ്പ് എന്നിവ ചേര്ത്ത് നന്നായി ഇളക്കി കൊടുക്കുക. പിന്നീട് ഇതിലേയ്ക്ക് നേരത്തെ മാറ്റിവെച്ചിരിക്കുന്ന നെല്ലിക്ക ചേര്ത്ത് കൊടുക്കുക. ഇവ നന്നായി ഇളക്കി യോജിപ്പിച്ചതിനു ശേഷം ആവശ്യത്തിന് വെള്ളം ചേര്ത്ത് നന്നായി തിളപ്പിക്കുക.
നന്നായി തിളച്ച ശേഷം പിന്നീട് അഞ്ച് മിനിറ്റ് മൂടി വെച്ച് വേവിക്കുക. ആ സമയം ഒരു കപ്പ് തേങ്ങയും മൂന്ന് ചെറിയ ഉള്ളിയും രണ്ട് പച്ചമുളകും ഒരു നുള്ള് ജീരകവും ആവശ്യത്തിന് വെള്ളവും ചേര്ത്ത് നന്നായി അരച്ചെടുക്കുക. അഞ്ച് മിനിറ്റിനു ശേഷം അതിലേക്ക് ചേര്ത്ത് അരച്ച തേങ്ങ ചേര്ത്ത് കൊടുക്കുക. നന്നായി യോജിപ്പിച്ചതിനു ശേഷം വെളിച്ചെണ്ണയില് കടുകും, വറ്റല്മുളകും, കറിവേപ്പിലയും ചേര്ത്ത് താളിക്കുക. വളരെ സ്വാദിഷ്ടവും ആരോഗ്യകരവുമായ നെല്ലിക്ക കറി തയ്യാറായിക്കഴിഞ്ഞു. ചപ്പാത്തിക്കും, ചോറിനും ഒപ്പം കഴിയ്ക്കാവുന്ന ഈ കറി കുട്ടികളും മുതിര്ന്നവരും ഒരുപോലെ ഇഷ്ടപ്പെടുന്നതാണ്.
