തിരുവനന്തപുരം: ആക്രമണോത്സുകമായ ബൗളിംഗ്. വിക്കറ്റ് വീഴ്ത്തുമ്പോൾ പഴയ ആവേശം. എട്ട് വർഷങ്ങൾക്ക് ശേഷം കളിക്കളത്തിലേയ്ക്കുള്ള മടങ്ങി വരവ് ആഘോഷിക്കുകയാണ് ശ്രീശാന്ത്.
37-ാം വയസിലും പ്രതിഭ നഷ്ടപ്പെട്ടിട്ടില്ലെന്ന് തെളിയിക്കുന്ന പ്രകടനമാണ് സയിദ് മുഷ്താഖ് അലി ട്രോഫിക്കായി ഒരുങ്ങുന്ന കേരള ടീമിന്റെ പരിശീലന മത്സരത്തിൽ ശ്രീശാന്ത് പുറത്തെടുത്തത്. കൃത്യതയും ആക്രമണോത്സുകതയും ഒരുപോലെ നിറഞ്ഞുനിൽക്കുന്ന ശ്രീശാന്തിന്റെ പഴയ ബൗളിംഗിന് കൈമോശം വന്നിട്ടില്ലെന്നാണ് പുറത്തുവന്ന വീഡിയോ വ്യക്തമാക്കുന്നത്.
ജനുവരി 10നാണ് സയിദ് മുഷ്താഖ് അലി ട്രോഫി ആരംഭിക്കുക. ഇതിന് മുന്നോടിയായി നടന്ന പരിശീലന മത്സരത്തിൽ പഴയ ബൗളിംഗ് ആക്ഷനും വേഗതയും അപ്പീൽ ചെയ്യുന്ന ശൈലിയും ഒന്നും മാറിയിട്ടില്ലെന്ന് വ്യക്തമാക്കിയ ശ്രീശാന്ത് ആവേശത്തോടെ പന്തെറിയുന്ന വീഡിയോ സമൂഹ മാദ്ധ്യമങ്ങളിൽ ഇതിനോടകം തന്നെ വൈറലായി കഴിഞ്ഞു. വിക്കറ്റ് വീഴ്ത്തിയ ശേഷമുള്ള പതിവ് ആഘോഷ രീതിയും വീഡിയോയിൽ കാണാം.
