മദീര: അനുവാദമില്ലാതെ ദേശീയ ടീം ക്യാമ്പ് വിട്ട സംഭവത്തില്‍ പോര്‍ച്ചുഗല്‍ ക്യാപ്റ്റന്‍ ക്രിസ്റ്റ്യാനോ റൊണാള്‍ഡോയ്‌ക്കെതിരെ അച്ചടക്ക നടപടി. പോര്‍ച്ചുഗീസ് ഫുട്‌ബോള്‍ ഫെഡറേഷന്‍ (എഫ്പിഎഫ്) താരത്തിന് താല്‍ക്കാലിക സസ്‌പെന്‍ഷന്‍ ഏര്‍പ്പെടുത്തി. സംഭവത്തില്‍ വിശദമായ അന്വേഷണം നടത്താനും ഫെഡറേഷന്‍ തീരുമാനിച്ചു. യുവേഫ നേഷന്‍സ് ലീഗ് മത്സരങ്ങളുമായി ബന്ധപ്പെട്ട് ദേശീയ ടീമിന്റെ ക്യാമ്പിലിരിക്കെയാണ് റൊണാള്‍ഡോ അനുവാദമില്ലാതെ ക്യാമ്പ് വിട്ടതെന്നാണ് റിപ്പോര്‍ട്ടുകള്‍. ടീമിന്റെ തിരഞ്ഞെടുപ്പുമായി ബന്ധപ്പെട്ട് താരത്തിന് അതൃപ്തിയുണ്ടായിരുന്നുവെന്നും പരിശീലകന്‍ യോര്‍ഗെ ജെസ്യൂസുമായി തര്‍ക്കമുണ്ടായതിനെത്തുടര്‍ന്നാണ് ക്യാമ്പ് വിട്ടതെന്നും റിപ്പോര്‍ട്ടുകളുണ്ട്.
സംഭവത്തില്‍ ഫെഡറേഷന്‍ സ്വീകരിക്കുന്ന ഏത് ശിക്ഷയും അംഗീകരിക്കുമെന്ന് റൊണാള്‍ഡോ പിന്നീട് പുറത്തിറക്കിയ പ്രസ്താവനയില്‍ വ്യക്തമാക്കിയിരുന്നു. എന്നാല്‍, അനുവാദമില്ലാതെ ദേശീയ ടീം ക്യാമ്പ് വിടുന്നത് ഫെഡറേഷന്റെ നിയമാവലി പ്രകാരം അച്ചടക്കലംഘനമാണ്. ഇതിന്റെ അടിസ്ഥാനത്തിലാണ് നടപടി. 2026 ഒക്ടോബര്‍ ഏഴിന് റിപ്പോര്‍ട്ട് ചെയ്യപ്പെട്ട സംഭവങ്ങളുടെ അച്ചടക്കപരമായ പ്രത്യാഘാതങ്ങള്‍ വിലയിരുത്താന്‍ ഒക്ടോബര്‍ ഒമ്പതിന് എഫ്പിഎഫിന്റെ നോണ്‍-പ്രൊഫഷണല്‍ വിഭാഗം യോഗം ചേര്‍ന്നിരുന്നു. ഇതിന് പിന്നാലെ റൊണാള്‍ഡോയ്‌ക്കെതിരെ അച്ചടക്ക നടപടികള്‍ ആരംഭിച്ചതായി ഫെഡറേഷന്‍ പ്രസ്താവനയില്‍ അറിയിച്ചു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
നടപടികള്‍ ആരംഭിക്കുന്നതുവരെയുള്ള താല്‍ക്കാലിക സസ്‌പെന്‍ഷനു പുറമേ, വിഷയത്തിന്റെ അടിയന്തര പ്രാധാന്യം കണക്കിലെടുത്ത് പ്രത്യേക താല്‍ക്കാലിക സസ്‌പെന്‍ഷനും ഏര്‍പ്പെടുത്തിയിട്ടുണ്ട്. ഒക്ടോബര്‍ 10ന് കേസ് ഫെഡറേഷന്റെ അച്ചടക്ക അന്വേഷണ സമിതിക്ക് കൈമാറി. അന്വേഷണം പൂര്‍ത്തിയാകുന്നതുവരെ കേസുമായി ബന്ധപ്പെട്ട വിവരങ്ങള്‍ പരസ്യപ്പെടുത്തുന്നതിനും നിയന്ത്രണം ഏര്‍പ്പെടുത്തിയിട്ടുണ്ട്. അന്വേഷണത്തിന് ശേഷമായിരിക്കും റൊണാള്‍ഡോയ്‌ക്കെതിരായ തുടര്‍നടപടികളില്‍ അന്തിമ തീരുമാനമുണ്ടാകുക.
