മെൽബൺ: ഓസ്ട്രേലിയൻ പര്യടനത്തിനെത്തിയ ഇന്ത്യൻ ടീമിലെ പ്രമുഖ താരങ്ങളെ ഐസൊലേഷനിലാക്കി. കൊറോണ പ്രോട്ടോക്കോൾ ലംഘിച്ചെന്ന് ചൂണ്ടിക്കാട്ടിയാണ് ക്രിക്കറ്റ് ഓസ്ട്രേലിയയുടെ നടപടി. ഇൻഡോർ റസ്റ്റോറന്റിൽ ഇരുന്ന് താരങ്ങൾ ഭക്ഷണം കഴിക്കുന്ന ദൃശ്യങ്ങൾ കഴിഞ്ഞ ദിവസം പുറത്തുവന്നിരുന്നു.
രോഹിത് ശർമ്മ, ഋഷഭ് പന്ത്, ശുഭ്മാൻ ഗിൽ, പൃഥ്വി ഷാ, നവ്ദീപ് സൈനി എന്നിവരെയാണ് പ്രോട്ടോക്കോൾ ലംഘനം ചൂണ്ടിക്കാട്ടി ഐസൊലേഷനിൽ പ്രവേശിപ്പിച്ചത്. ടീം ഹോട്ടലിന് പുറത്തുപോയി ഭക്ഷണം കഴിക്കാൻ കളിക്കാർക്ക് അനുവാദമുണ്ട്. എന്നാൽ ഔട്ട് ഡോർ റെസ്റ്റോറന്റുകളിൽ വേണമെന്നാണ് നിർദ്ദേശമുള്ളത്. എന്നാൽ താരങ്ങൾ ഇൻഡോർ റെസ്റ്റോറന്റിൽ ഇരിക്കുന്നതിന്റെ ദൃശ്യങ്ങളാണ് പുറത്തുവന്നത്.
മറ്റുള്ളവരുമായി അടുത്ത് ഇടപഴകരുതെന്ന് കർശന നിർദ്ദേശം നിലനിൽക്കെയാണ് താരങ്ങൾ പുറത്തുപോയത്. ഒരു ആരാധകനാണ് താരങ്ങളുടെ വീഡിയോ ട്വിറ്ററിലൂടെ പുറത്തുവിട്ടത്. സംഭവത്തിൽ ബിസിസിഐ അന്വേഷണം ആരംഭിച്ചു. പ്രോട്ടോക്കോൾ ലംഘനത്തെക്കുറിച്ച് അന്വേഷണം നടക്കുകയാണെന്ന് ക്രിക്കറ്റ് ഓസ്ട്രേലിയയും അറിയിച്ചിട്ടുണ്ട്.
നേരത്തെ, ന്യൂസിലാൻഡ് പര്യടനത്തിനെത്തിയ പാകിസ്താൻ ടീമും കൊറോണ പ്രോട്ടോക്കോളുകൾ ലംഘിച്ചതായി കണ്ടെത്തിയത് വലിയ വിവാദമായിരുന്നു. ഇതിന് പിന്നാലെ പത്തിലധികം പാക് താരങ്ങൾക്ക് കൊറോണ സ്ഥിരീകരിച്ചതോടെ പാക് ക്രിക്കറ്റ് ബോർഡും ന്യൂസിലാൻഡ് ക്രിക്കറ്റും തമ്മിൽ വാക് പോര് ഉണ്ടാകുകയും ചെയ്തിരുന്നു.
