മുംബൈ: മുംബൈയുടെ സീനിയർ ടീമിൽ ആദ്യമായി ഇടംനേടി ക്രിക്കറ്റ് ഇതിഹാസം സച്ചിൻ ടെണ്ടുൽക്കറുടെ മകൻ അർജുൻ ടെണ്ടുൽക്കർ. സയിദ് മുഷ്താഖ് അലി ട്രോഫിക്കായുള്ള 22 അംഗ ടീമിലാണ് ഇടം കൈയ്യൻ പേസറായ അർജുൻ ഇടംനേടിയത്. മുംബൈ ചീഫ് സലിൽ അങ്കോലയാണ് ഇക്കാര്യം അറിയിച്ചത്.
അർജുന് പുറമെ, ക്രുതിക് ഹനഗവാദിയും ടീമിൽ ഇടംനേടിയിട്ടുണ്ട്. നേരത്തെ, 20 അംഗ ടീമിനെ തെരഞ്ഞെടുക്കാനായിരുന്നു ബിസിസിഐ നിർദ്ദേശം നൽകിയിരുന്നത്. ഇതിന് ശേഷം രണ്ട് പേരെക്കൂടി ടീമിൽ ഉൾപ്പെടുത്തുകയായിരുന്നു എന്ന് മുംബൈ ക്രിക്കറ്റ് അസോസിയേഷൻ അറിയിച്ചു.
സൂര്യകുമാർ യാദവാണ് മുംബൈ ടീമിനെ നയിക്കുക. ടീമിന്റെ എല്ലാ മത്സരങ്ങളും മുംബൈയിലാണ് നടക്കുക. ജനുവരി 10നാണ് സയിദ് മുഷ്താഖ് അലി ട്രോഫി ആരംഭിക്കുക. നേരത്തെ, ശ്രീലങ്കയിൽ പര്യടനം നടത്തിയ ഇന്ത്യയുടെ അണ്ടർ-19 ടീമിൽ അർജുൻ ടെണ്ടുൽക്കർ കളിച്ചിട്ടുണ്ട്. ഇതിന് പുറമെ ഇന്ത്യൻ ദേശീയ ടീമിനെതിരെ നെറ്റ്സിൽ അർജുൻ ബൗൾ ചെയ്തിട്ടുമുണ്ട്.
