ടാറ്റയുടെ ജനപ്രിയ മോഡലായിരുന്ന സഫാരി തിരികെയെത്തുന്നു. ഈ മാസം അവസാനത്തോടെ വാഹനം വിപണിയിലേക്കെത്തും. കമ്പനി തന്നെയാണ് ഇക്കാര്യം ഔദ്യോഗികമായി അറിയിച്ചത്. അടിമുടി മാറ്റവുമായാണ് പുതിയ സഫാരി എത്തുന്നത്. കഴിഞ്ഞ ഓട്ടോ എക്സ്പോയിൽ ഗ്രാവിറ്റാസ് എന്ന പേരിൽ അവതരിപ്പിച്ച മോഡലാണ് സഫാരിയായി ഇന്ത്യൻ നിരത്തിൽവീണ്ടും തരംഗം സൃഷ്ടിക്കാൻ എത്തുന്നത്.
റീക്ലെയിം യുവർ ലൈഫ് എന്ന ടാഗ് ലൈനോട് കൂടി തന്നെയാണ് പുതിയ സഫാരിയും എത്തുന്നത്. 1998-ൽ ടാറ്റ മോട്ടോർസ് ഇന്ത്യയിൽ അവതരിപ്പിച്ച സഫാരിയുടെ തലവാചകം ആണിത്. വിപണയിലെത്തിയത് മുതൽ 2019 ൽ പടിയിറങ്ങുന്നതുവരെയുള്ള 20 വർഷത്തോളം തലയെടുപ്പുള്ള എസ്യുവി എന്നതിന്റെ അവസാന വാക്കായിരുന്നു ടാറ്റ സഫാരി.
ഹാരിയറിന്റെ സെവൻ സീറ്ററായി ഗ്രാവിറ്റാസ് എന്നുമെന്നായിരുന്നു ഓട്ടോ എക്സ്പോയിൽ ടാറ്റ അറിയിച്ചിരുന്നത്. സഫാരിയെന്ന ജനപ്രിയ മോഡലിന്റെ പേര് മുതൽക്കൂട്ടാകുമെന്ന പ്രതീക്ഷയിലാണ് പുതിയ വാഹനത്തിനും ആ പേര് നൽകിയിരിക്കുന്നത്. മൂന്നു നിരകളിലായി ആറും ഏഴും സീറ്റുള്ള വകഭേദങ്ങളിൽ സഫാരി ലഭ്യമാകും. ഹാരിയറിനെ പോലെ രണ്ടു ലിറ്റർ, ക്രയോടെക് ഡീസൽ എൻജിനാവും സഫാരിക്കും കരുത്തേകുക. 170 പി എസ് വരെ കരുത്തും 350 എൻ എം ടോർക്കും സൃഷ്ടിക്കാൻ പ്രാപ്തിയുള്ള എൻജിനാണ് വാഹനത്തിനുണ്ടാവുക.
വാഹനത്തിന്റെ കൂടുതൽ വിവരങ്ങൾ കമ്പനി പുറത്തുവിട്ടിട്ടില്ല. ഈ വരുന്ന റിപ്പബ്ലിക് ദിനത്തിൽ സഫാരി എത്തുമെന്നാണ് പ്രതീക്ഷിക്കുന്നത്.
