മനസ്സിനേയും കണ്ണുകളേയും ഒരുപോലെ കുളിരണിയിക്കാന് സാധിക്കും എന്നത് പ്രകൃതിയുടെ ഏറ്റവും വലിയ പ്രത്യേകത തന്നെയാണ്. നഗരത്തെയും തിരക്കിട്ട ജീവിതത്തെയും വിട്ട് കുറച്ചു സമയം യാത്രയ്ക്കായി മാറ്റിവയ്ക്കുന്ന മിക്ക ആളുകളും യാത്രയ്ക്ക് തിരഞ്ഞെടുക്കുന്നത് ഇത്തരത്തിലുള്ള പ്രകൃതി സുന്ദരമായ സ്ഥലങ്ങളാണ്. അത്തരത്തില് സഞ്ചാരികളെ ആകര്ഷിക്കുന്ന പ്രകൃതി രമണീയമായ ഒരു സ്ഥലമാണ് കോഴിക്കോട് ജില്ലയില് സ്ഥിതി ചെയ്യുന്ന കക്കയം. ദിവസം തോറും നിരവധി വിനോദസഞ്ചാരികള് ഇവിടേക്ക് എത്തുന്നുണ്ടെങ്കിലും കക്കയത്തിന്റെ പ്രകൃതി സൗന്ദര്യം കോഴിക്കോട്ടുകാര് അധികം ആസ്വദിച്ചില്ല എന്നുതന്നെ പറയാം. കക്കയം ബസ് സ്റ്റോപ്പില് നിന്നും 15 കിലോമീറ്റര് മാത്രമാണ് കക്കയം വിനോദസഞ്ചാര കേന്ദ്രത്തിലേക്കുള്ള ദൂരം.
നിരവധി വ്യത്യസ്തമായ അനുഭവങ്ങളാണ് ഇവിടെ എത്തുന്ന ഓരോ സഞ്ചാരികളെയും കാത്തിരിക്കുന്നത്. ഇവിടെയെത്തുന്ന സഞ്ചാരികളെ ആദ്യം കാത്തിരിക്കുന്നത് ബോട്ട് റൈഡിങ്ങാണ്. കക്കയത്തിന്റെ ഓളപ്പരപ്പില് തട്ടിയും തലോടിയും വേഗത്തിലുള്ള ഈ ബോട്ട് യാത്ര ആരെയും ആകര്ഷിക്കുന്ന ഒന്നാണ്. വളരെ മനോഹരമായ തോണിക്കടവാണ് ഇവിടുത്തെ ആകര്ഷകമായ മറ്റൊരു സ്ഥലം. പ്രകൃതി സൗന്ദര്യവും കോടമഞ്ഞും കുളിര്കാകാറ്റും നിറഞ്ഞൊഴുകുന്നയിടം. വെള്ളച്ചാട്ടത്തിന് അധികം ആഴമില്ലാത്തതിനാല് ഇവിടെ ഇറങ്ങാനും കുളിക്കാനും എല്ലാം സാധിക്കും. പിന്നീടുള്ള കാഴ്ച കക്കയം ഡാം തന്നെ. മല മുകളില് നിന്നുള്ള ഡാമിന്റെ കാഴ്ച ഏറെ മനോഹരം തന്നെ.
കക്കയത്തെ ആകര്ഷകമാക്കുന്ന രണ്ടു വെള്ളച്ചാട്ടങ്ങളാണ് അമ്പലപ്പാറ വെള്ളച്ചാട്ടവും ഉരക്കുഴി വെള്ളച്ചാട്ടവും .വളരെ മനോഹരമായ ഇവിടം വലിയൊരു ദൃശ്യാനുഭവമാണ് നമുക്ക് നല്കുന്നത് . ഈ പാറക്കെട്ടുകളുടെ മുകളില് പണ്ട് ആദിവാസികള് വസിച്ചിരുന്നു എന്നും അവര് നിര്മ്മിച്ച ക്ഷേത്രം ഉണ്ടായിരുന്നു എന്നും വിശ്വസിക്കപ്പെടുന്നു. അമ്പലപ്പാറ വെള്ളച്ചാട്ടത്തിനു എതിര് വശത്താണ് ഉരക്കുഴി വെള്ളച്ചാട്ടം സ്ഥിതി ചെയ്യുന്നത്. കാണാന് വളരെ സുന്ദരമാണെങ്കിലും അപകടകാരിയാണ് ഉരക്കുഴി വെള്ളച്ചാട്ടം.
