സിഡ്നി: കാണികളിൽ നിന്നും വംശീയ അധിക്ഷേപമുണ്ടായതിനോട് ഇന്ത്യൻ താരം കാണിച്ച മാതൃകാപരമായ സമീപനത്തിനെ പ്രശംസിച്ച് ഓസീസ് താരം നഥാൻ ലയൺ. സിഡ്നിയിലെ മൂന്നാം ടെസ്റ്റിനിടെയാണ് ബൗണ്ടറി ലൈനിൽ ഫീൽഡ് ചെയ്തിരുന്ന മുഹമ്മദ് സിറാജിന് നേരെ താരം കേൾക്കെ അസഭ്യ വർഷമുണ്ടായത്. തിരികെ പ്രതികരിക്കാതെ അംബയറോട് കാര്യം വിശദീകരിക്കുകയാണ് സിറാജ് ചെയ്തത്.
ക്രിക്കറ്റ് ഉൾപ്പടെ മറ്റെല്ലാ കായിക ഇനങ്ങളിലും വംശീയ വിദ്വേഷം ഒരിക്കലും അനുവദിക്കാനാകാത്തതാണ്. കാണികൾ എല്ലാ ഒരു രസമായിട്ടാണ് കാണുന്നത്. എന്നാൽ പലരേയും അത് ബാധിക്കുന്നത് പലതരത്തിലായിരിക്കും. ക്രിക്കറ്റ് എല്ലാവർക്കും വേണ്ടിയാണെന്ന് മറക്കരുതെന്നും ലയൺ ഓർമ്മിപ്പിച്ചു.
ഓസ്ട്രേലിയ വലിയ വിജയപ്രതീക്ഷ വച്ചുപുലർത്തിയ മൂന്നാം ടെസ്റ്റിൽ ബൗളിംഗിൽ മികച്ച പ്രകടനം നടത്തിയ താരമാണ് സിറാജ്. ബാറ്റിംഗിൽ ഇന്ത്യൻ മദ്ധ്യനിരയിൽ ഹനുമാ വിഹാരിയും അശ്വിനും നടത്തിയ ധീരമായ ചെറുത്തു നിൽപ്പാണ് ഇന്ത്യക്ക് വിജയസമാന സമനില നൽകിയത്.
