ബ്രിസ്ബെയിൻ:നാലാം ടെസ്റ്റിൽ ഓസീസ് 369 റൺസിന് പുറത്തായി. രണ്ടാം ദിനത്തിൽ ക്യാപ്റ്റൻ ടിം പെയിനിന്റെ അർദ്ധസെഞ്ച്വറിയുടെ മികവിലാണ് ഓസീസ് മികച്ച സ്്കോറിലേക്ക് എത്തിയത്. ഇന്ത്യൻ ബൗളിംഗ് നിരയിൽ യുവതാരങ്ങൾ വീണ്ടും തിളങ്ങിയ ദിനത്തിൽ നടരാജനും, ഷാർദ്ദുൽ ഠാക്കൂറും, വാഷിംഗ്ടൺ സുന്ദറും മൂന്ന് വിക്കറ്റുകൾ വീതം സ്വന്തമാക്കി.
ഇന്നലെ ബാറ്റിംഗ് പുനരാരംഭിച്ച കാമറൂൺ ഗ്രീൻ- ടിം പെയിൻ സഖ്യം സ്കോർ 311ൽ നിൽക്കേ അടുത്തടുത്ത ഓവറുകളിൽ പിരിഞ്ഞു. അർദ്ധസെഞ്ച്വറി നേടി മികച്ച സ്കോറിന് അടിത്തറയിട്ട നായകൻ ടിം പെയിൻ ഷാർദ്ദൂലിന്റെ പന്തിൽ രോഹിത് ശർമ്മ പിടിച്ചു പുറത്തായി. അടുത്ത ഓവറിൽ കാമറൂൺ ഗ്രീനിനെ 47 റൺസ് എടുത്തു നിൽക്കേ വാഷിംഗ്ടൺ സുന്ദർ ബൗൾഡാക്കി. പാറ്റ് കമ്മിൻസ് 2 റൺസിന് ഠാക്കുറിന് വിക്കറ്റ് സമ്മാനിച്ചപ്പോൾ നഥാൻ ലയണിനെ 24 റൺസിൽ വാഷിംഗ്ടൺ സുന്ദറും ജോഷ് ഹേസൽവുഡിനെ 11 റൺസിന് നടരാജും ബൗൾഡാക്കി. മിച്ചൽ സ്റ്റാർക്ക് 20 റൺസുമായി പുറത്താകാതെ നിന്നു.
ആദ്യ ഇന്നിംഗ്സിൽ ഇന്ത്യൻ ബൗളിംഗ് നിരയിൽ ടി.നടരാജൻ 78 റൺസിന് 3 വിക്കറ്റ് വീഴ്ത്തി. ഷാർദ്ദൂൽ ഠാക്കൂർ 94 റൺസിന് മൂന്ന് വിക്കറ്റും വാഷിംഗ്ടൺ സുന്ദർ 89 റൺസിന് 3 വിക്കറ്റും നേടി. മുഹമ്മദ് സിറാജ് ഒരു വിക്കറ്റ് സ്വന്തമാക്കി.
Comments