തീയേറ്ററുകൾ തുറന്നതോടെ ആരാധകർ ഏറ്റവും ആവേശത്തോടെ കാത്തിരിക്കുന്ന മോഹൻലാലിന്റെ ബിഗ് ബജറ്റ് ചിത്രമാണ് മരക്കാർ അറബിക്കടലിന്റെ സിംഹം. സിനിമയെ കുറിച്ച് പുറത്തുവരുന്ന വിവരങ്ങളെല്ലാം ആരാധകർ ഇരുകയ്യും നീട്ടി സ്വീകരിക്കാറുമുണ്ട്. ഇപ്പോഴിതാ ചിത്രത്തിലെ പുതിയ ഗാനം ഉടനെത്തുമെന്ന് അറിയിക്കുകയാണ് മോഹൻലാൽ.
ഫെബ്രുവരി അഞ്ചിന് മരക്കാറിലെ ‘കുഞ്ഞു കുഞ്ഞാലി’ എന്ന ഗാനത്തിന്റെ ലിറിക്കൽ വീഡിയോ പുറത്തിറങ്ങുമെന്നാണ് മോഹൻലാൽ അറിയിച്ചിരിക്കുന്നത്. റോണ റാഫേലാണ് ചിത്രത്തിനായി സംഗീതം ഒരുക്കുന്നത്. കെഎസ് ചിത്ര, എംജി ശ്രീകുമാർ ശ്രേയാ ഘോഷാൽ, വിനീത് ശ്രീനിവാസൻ എന്നിവർ മരക്കാറിനായി സംഗീതം ആലപിക്കുന്നു.
ചിത്രം മാർച്ച് 26ന് റിലീസ് ചെയ്യാനാണ് തീരുമാനിച്ചത്. എന്നാൽ കൊറോണയുടെ പശ്ചാത്തലത്തിൽ റിലീസ് ഡേറ്റ് മാറ്റുകയായിരുന്നു. ഇപ്പോൾ പുറത്തുവരുന്ന വിവരം അനുസരിച്ച് ചിത്രം ഓണം റിലീസ് ആയിരിക്കുമെന്നാണ് സൂചന.
പ്രിയദർശൻ സംവിധാനം ചെയ്യുന്ന ചിത്രത്തിൽ മഞ്ജു വാര്യർ, കല്യാണി പ്രിയദർശൻ, പ്രണവ് മോഹൻലാൽ, കീർത്തി സുരേഷ് എന്നിവരാണ് പ്രധാന വേഷങ്ങളിലെത്തുന്നത്. ആന്റണി പെരുമ്പാവൂരാണ് ചിത്രം നിർമ്മിക്കുന്നത്.
https://www.facebook.com/ActorMohanlal/posts/260951148731491
