ചെന്നൈ: ഓസ്‌ട്രേലിയക്കെതിരായ ടെസ്റ്റ് പരമ്പരയിൽ വിജയിച്ച് നാട്ടിലെത്തിയ ശേഷം കങ്കാരു കേക്ക് മുറിക്കാൻ വിസമ്മതിച്ചതിന് പിന്നിലെ കാരണം വിശദമാക്കി ഇന്ത്യൻ ക്രിക്കറ്റ് താരം അജിങ്ക്യാ രഹാനെ. കങ്കാരു ഓസ്‌ട്രേലിയയുടെ ദേശീയ മൃഗമാണെന്നും അതിനാൽ തന്നെ അത് മുറിച്ച് വിജയം ആഘോഷിക്കാൻ തനിക്ക് കഴിയില്ലെന്നും രഹാനെ പറഞ്ഞു.
വിജയിച്ചാലും ചരിത്രം കുറിച്ചാലും എതിരാളികളെ ബഹുമാനിക്കണമെന്നാണ് തന്റെ നയമെന്നും അദ്ദേഹം വ്യക്തമാക്കി. കമന്റേറ്റർ ഹർഷ ഭോഗ്‌ലെയ്‌ക്ക് നൽകിയ അഭിമുഖത്തിലാണ് രഹാനെയുടെ പ്രതികരണം.
എത്ര വലിയ വിജയമാണെങ്കിലും എതിരാളികളെയും അവരുടെ രാജ്യത്തേയും ഒരു പോലെ ബഹുമാനിക്കണം. അതിനാലാണ് വീട്ടിൽ വെച്ച് കങ്കാരു കേക്ക് മുറിക്കാൻ വിസമ്മതിച്ചതെന്നും രഹാനെ കൂട്ടിച്ചേർത്തു. ഓസിസിനെതിരായ ടെസ്റ്റ് പരമ്പര 2-1 ന് സ്വന്തമാക്കി ഇന്ത്യയിലേക്ക് തിരിച്ചെത്തിയ ക്രിക്കറ്റ് ടീമിന് വൻ സ്വീകരണമാണ് രാജ്യത്ത് ഒരുക്കിയിരുന്നത്. രഹാനെയെ സ്വീകരിക്കാനായി കങ്കാരു കേക്ക് തയ്യാറാക്കിയതും രഹാനെ അത് മുറിക്കാതെ മാറി പോകുന്നതും സാമൂഹ്യ മാദ്ധ്യമങ്ങളിലടക്കം വലിയ വാർത്തയായിരുന്നു. കേക്ക് മുറിക്കാൻ തുടങ്ങുമ്പോഴായിരുന്നു അതിലെ കങ്കാരുവിന്റെ ചിത്രം രഹാനെയുടെ ശ്രദ്ധയിൽപ്പെടുന്നത് ഉടൻ തന്നെ അദ്ദേഹം അത് മുറിക്കാതെ ഒഴിഞ്ഞു മാറുകയായിരുന്നു.
