മുംബൈ : ഹാർലി ഡേവിഡ്സൺ ഉത്പന്നങ്ങളുടെ വിപണനത്തിനും വിതരണത്തിനുമായി പ്രത്യേകം ഡിവിഷൻ സജ്ജമാക്കി മോട്ടോർ സൈക്കിൾ നിർമ്മാതാക്കളായ ഹീറോ മോട്ടോ കോർപ്പ്. ആഗോളതലത്തിൽ പ്രശസ്തനായ ഓട്ടോമോട്ടീവ് വിദഗ്ദ്ധൻ രവി ആവലൂരാണ് പുതിയ ഡിവിഷന്റെ തലവൻ. ഹീറോ മോട്ടോ കോർപ്പ് ചെയർമാനും സിഇഒയുമായ ഡോ.പവൻ മഞ്ജലിനായിരിക്കും ഇദ്ദേഹം റിപ്പോർട്ടുകൾ നൽകേണ്ടി വരിക.
വാഹന എഞ്ചിനും യന്ത്രഭാഗങ്ങളും നിർമ്മിക്കുന്ന കൂപ്പർ ഉപേക്ഷിച്ചാണ് രവി ഹീറോ മോട്ടോകോർപിലേക്ക് വന്നിരിക്കുന്നത്. കൂപ്പറിൽ ഇദ്ദേഹം സ്ട്രാറ്റജി ആൻറ് ഇൻറർനാഷണൽ ബിസ്നസ് തലവനായിരുന്നു. അതിന് മുൻപ് ഡുകാറ്റി ഇന്ത്യയുടെ മാനേജിങ് ഡയറക്ടർ ആയിരുന്നു രവി.
പുതിയ ടീമിൽ ഇന്ത്യയിലെ പ്രവർത്തനത്തിന് ഹാർലിഡേവിഡ്സണിൽ നിന്നുള്ള നാല് എക്സിക്യൂട്ടീവുകളും ഉൾപ്പെടുന്നുണ്ട്. വിപണനം, മാർക്കറ്റിങ്, ഉപഭോക്തൃ സേവനം, ലോജിസ്റ്റിക്സ് മേഖലകളിൽ ഇവരുടെ അനുഭവ സമ്പത്ത് മുതൽകൂട്ടാവും. ജനുവരി 18 മുതൽ ഡീലർമാർക്കുള്ള ഹാർലി ഡേവിഡ്സൺ ഉത്പന്നങ്ങളുടെ ഹോൾസെയിൽ വിതരണം ആരംഭിക്കും.
Comments