മുംബൈ: ഇംഗ്ലണ്ടിനെതിരായ ട്വന്റി-20 പരമ്പരയ്‌ക്കുളള സ്‌ക്വാഡിനെ ബിസിസിഐ പ്രഖ്യാപിച്ചു. മലയാളി താരം സഞ്ജു വി. സാംസൺ ടീമിൽ ഇടംപിടിച്ചില്ല. വിരാട് കോഹ് ലി നായകനും രോഹിത് ശർമ്മ ഉപനായകനുമായിട്ടാണ് സ്‌ക്വാഡിനെ പ്രഖ്യാപിച്ചത്.
കെ.എൽ രാഹുൽ, ശിഖർ ധവാൻ, ശ്രേയസ് അയ്യർ, സൂര്യകുമാർ യാദവ്, ഹാർദ്ദിക്, ചഹൽ, അക്‌സർ പട്ടേൽ, വാഷിംഗ്ടൺ സുന്ദർ, ആർ. തെവാതിയ, വരുൺ ചക്രവർത്തി, ടി. നടരാജൻ, ഭുവനേശ്വർ കുമാർ, ദീപക് ചഹാർ, നവ്ദീപ്, ശ്രാദ്ധൂൽ ഠാക്കൂർ എന്നിവരാണ് സ്‌ക്വാഡിൽ ഉളളത്. ഋഷഭ് പന്തിനൊപ്പം ഇഷാൻ കിഷനെയും വിക്കറ്റ് കീപ്പർമാരായി ഉൾപ്പെടുത്തിയിട്ടുണ്ട്. വിജയ് ഹസാരെ ട്രോഫിയിൽ 173 റൺസ് നേടി മികച്ച പ്രകടനം നടത്തിയതിന് പിന്നാലെയാണ് ഇഷാൻ കിഷൻ ദേശീയ ടീമിൽ ഇടംപിടിച്ചത്.
ഇഷാൻ കിഷൻ, സൂര്യകുമാർ യാദവ്, തെവാതിയ എന്നിവർ ആദ്യമായിട്ടാണ് ഇന്ത്യൻ ടീമിൽ ഇടംനേടുന്നത്. കഴിഞ്ഞ വർഷം അവസാനം ഓസ്‌ട്രേലിയയിൽ നടന്ന ട്വന്റി-20 സ്‌ക്വാഡിൽ സഞ്ജു ഉണ്ടായിരുന്നു. ഈ സ്‌ക്വാഡിൽ സഞ്ജുവിനൊപ്പം ഉണ്ടായിരുന്ന മായങ്ക് അഗർവാൾ പരിക്കിന്റെ പിടിയിലുളള മനീഷ് പാണ്ഡെ എന്നിവരെയും ഇക്കുറി ഒഴിവാക്കിയിട്ടുണ്ട്. ജസ്പ്രീത് ബൂമ്രയും ടീമിൽ ഇടംപിടിച്ചില്ല.
