ചമോലി: ഉത്തരാഖണ്ഡ് പ്രളയദുരന്തത്തിൽ മരണസംഖ്യ 70 എത്തിയതായി അധികൃതർ. തിരച്ചിൽ ഏതാണ്ട് പൂർത്തിയായെന്ന് തീരുമാനിച്ച ശേഷമാണ് ഇന്ന് രാവിലെ രണ്ടു മൃതശരീരങ്ങൾ കൂടി കണ്ടെത്തിയത്. ചമോലി ജില്ലാ അധികൃതരാണ് വിവരം പുറത്തുവിട്ടത്.
രണ്ടു വ്യത്യസ്ത പ്രദേശങ്ങളിൽ നിന്നാണ് മൃതദേഹം കണ്ടെത്തിയത്. ഒരെണ്ണം ശ്രീനഗർ ചൗരാഹ എന്ന സ്ഥലത്തുനിന്നും ഒരെണ്ണം കീർത്തി നഗറിലുമാണ് കണ്ടെത്തിയത്. ആകെ 206 പേരെയാണ് കാണാതായത്. ഇതിൽ 70 മൃതശരീരങ്ങളും 29 ശരീരഭാഗങ്ങളും കണ്ടെത്തിയതായാണ് വിവരം.
രക്ഷാ പ്രവർത്തനം ഊർജ്ജിതമായി നടക്കുകയാണ്. ഇനിയും കണ്ടെത്താനുള്ള 134 പേരെ മരിച്ചതായി കണക്കാക്കാക്കണമെന്നാണ് ഭരണകൂടം ബന്ധുക്കൾക്ക് നൽകുന്ന നിർദ്ദേശം. ഇന്തോ-ടിബറ്റൻ സേനയും ദേശീയ ദുരന്ത നിവാരണ സേനയും 16-ാം ദിവസവും തിരച്ചിൽ തുടരുകയാണ്. തുരങ്കത്തിൽ നിന്നുള്ള ചളിയും മണ്ണും ഉറച്ചുപോയ സിമന്റും നീക്കുന്ന ജോലികൾ യുദ്ധകാലാടിസ്ഥാനത്തിൽ നടക്കുകയാണ്.
