മുംബൈ : ടാറ്റയുടെ ഏറ്റവും പുതിയ സെവൻ സീറ്ററായ സഫാരിയ്ക്ക് ഹ്യൂണ്ടായിയിൽ നിന്നും ഒരു എതിരാളി വരുന്നു. അൽകാസർ എന്ന് പേരിട്ടിരിക്കുന്ന വാഹനം ക്രെറ്റയുടെ സെവൻ സീറ്റർ പതിപ്പാണെന്നാണ് പുറത്ത് വരുന്ന റിപ്പോർട്ടുകൾ. വാഹനത്തെപ്പറ്റി കൂടുതൽ വിവരങ്ങൾ നൽകുന്നില്ലെങ്കിലും അൽകാസർ എന്ന പേരിലായിരിക്കും വാഹനം പുറത്തിറങ്ങുകയെന്ന് ഹ്യൂണ്ടായി ഔദ്യോഗികമായി സ്ഥിരീകരിച്ചിട്ടുണ്ട്.
കിയ സെല്റ്റോസിനും ഹ്യുണ്ടായി ക്രെറ്റയ്ക്കും അടിസ്ഥാനമൊരുക്കുന്ന കെ2 പ്ലാറ്റ്ഫോമിന്റെ പുതുക്കിയ പതിപ്പിലാണ് അല്കാസര് നിർമ്മിച്ചിരിക്കുന്നത്. ക്രെറ്റയെക്കാള് 20 എം.എം. വീല്ബേസും 30 എം.എം. നീളവും കൂട്ടായാണ് അല്കാസര് ഒരുക്കിയിരിക്കുന്നത്. മുൻഭാഗത്തെ ഡിസൈൻ ക്രെറ്റയ്ക്ക് സമാനമാണെങ്കിലും പിൻഭാഗത്തെ ഡിസൈനിൽ വലിയ മാറ്റം തന്നെ വരുത്തിയിട്ടുണ്ട്. ആറ്, ഏഴ് സീറ്റിംഗ് ഓപ്ഷനുകളില് പ്രതീക്ഷിക്കാം.
ടാറ്റയുടെ പുതിയ സഫാരി, മഹീന്ദ്രയുടെ എക്സ് യുവി500, എംജിയുടെ ഹെക്ടർ പ്ലസ് തുടങ്ങിയവർക്ക് എതിരാളിയായാണ് അൽകാസർ എത്തുന്നത്. എന്നാൽ പ്രധാന വെല്ലുവിളിയാകുന്നത് ടൊയോട്ടയുടെ ജനപ്രിയ വാഹനമായ ഇന്നോവയ്ക്ക് ആയിരിക്കും. 2021 പകുതിയോടെ വാഹനം നിരത്തിലെത്തുമെന്നാണ് പ്രതീക്ഷിക്കുന്നത്. 14 ലക്ഷം മുതലായിരിക്കും വില തുടങ്ങുന്നത്.
