ലോകത്താകമാനമുളള വനിതകള്‍ക്ക് ആദരവുമായി അന്താരാഷ്‌ട്ര വനിതാദിനത്തോട് അനുബന്ധിച്ച് ഗൂഗിള്‍ ഷോര്‍ട്ട് വീഡിയോ ഡൂഡില്‍ പുറത്തിറക്കിയിരിക്കുകയാണ്. അന്താരാഷ്‌ട്ര തലത്തില്‍ ആദ്യമായി പുതിയ കാര്യങ്ങള്‍ ചെയ്ത വനിതകളുടെ കൈകള്‍ മാത്രം ഉള്‍പ്പെടുത്തിയാണ് വീഡിയോ പുറത്തിറക്കിയിരിക്കുന്നത്. ലോകത്തിലെ ആദ്യ വനിത ഡോക്ടര്‍, ശാസ്ത്രജ്ഞ, ബഹിരാകാശ യാത്രിക, എന്‍ജിനിയര്‍, ആക്ടിവിസ്റ്റ്, കലാകാരി തുടങ്ങിയവരുടെ കൈകള്‍ മാത്രം ഉള്‍പ്പെടുത്തിയാണ് ഡൂഡില്‍ വീഡിയോ പുറത്തിറക്കിയിരിക്കുന്നത്.
പ്രതിസന്ധികളെ തരണം ചെയ്ത് കഴിവില്‍ ഉറച്ചു വിശ്വസിച്ച് രംഗത്തേക്ക് വരാന്‍ ധൈര്യം കാണിച്ച സ്ത്രീകളുടെ കൈകള്‍ ചിത്രീകരിച്ച വീഡിയോയിലൂടെ അവഗണനയെ ഇല്ലായ്മ ചെയ്തു കൊണ്ട് ധൈര്യത്തോടെ മുന്നേറാനുളള പ്രചോദനം നല്‍കുകയാണ് ഗൂഗിള്‍. അതു പോലെ താന്‍ പ്രവര്‍ത്തിക്കുന്ന മേഖലയില്‍ പൂര്‍ണ വിജയം കൈവരിച്ച സ്ത്രീകളില്‍ ഒരാളായ ഹെലന്‍ ലെറോക്സാണ് ഈ വീഡിയോയുടെ നിര്‍മ്മാതാവ്. അന്താരാഷ്‌ട്ര വനിതാ ദിന ഡൂഡില്‍ വിദ്യാഭ്യാസം, പൗരാവകാശങ്ങള്‍, ശാസ്ത്രം, കലകള്‍ എന്നീ മേഖലകളില്‍ ആദ്യമായി എത്തുകയും പിന്നില്‍ വരാനിരിക്കുന്ന തലമുറയ്‌ക്ക് വഴികാട്ടികള്‍ ആവുകയും ചെയ്ത വനിതകളെ ആദരിക്കുകയും ചെയ്യുന്നു.
ചരിത്രത്തില്‍ ഇടം നേടിയ നിരവധി സംഭവങ്ങള്‍ നടന്ന അതേ മാസത്തില്‍ തന്നെയാണ് വനിത ദിനവും വരുന്നത് എന്ന കാര്യം എടുത്തു പറയേണ്ട ഒന്നു തന്നെയാണ്.‘ ഭൂതകാലത്തിന്റെയും വര്‍ത്തമാനത്തിന്റെ ഭാവിയുടെയും വഴികാട്ടികള്‍ക്കുള്ള ആദരം അര്‍പ്പിക്കുന്നു,’‘ . അന്താരാഷ്‌ട്ര വനിതാദിനത്തില്‍ വനിതകള്‍ക്ക് ആശംസകള്‍ അര്‍പ്പിച്ചു കൊണ്ട് ഗൂഗിള്‍ കുറിച്ചു. പ്രശസ്തരായ വ്യക്തികളുടെ ജന്മചരമ വാര്‍ഷിക ദിനങ്ങളിലും അന്താരാഷ്‌ട്ര ദിനാചരണങ്ങളുടെ ഭാഗമായും ഗൂഗിള്‍ ഡൂഡില്‍ പുറത്തിറക്കാറുണ്ട്.
