കൊല്‍ക്കത്ത: പശ്ചിമ ബംഗാളിലെ കൊല്‍ക്കത്തയില്‍ ദുര്‍ഗാപൂജ പന്തലിലുണ്ടായ തിക്കിലും തിരക്കിലും പെട്ട് 18 പേര്‍ മരിച്ചു. 25 പേര്‍ക്ക് പരിക്കേറ്റു. ശനിയാഴ്ച വൈകിട്ട് ഏഴോടെ ചോര്‍ബഗാനിലെ ദുര്‍ഗാപൂജ പന്തലിലാണ് അപകടമുണ്ടായത്. ശക്തമായ മഴയും ഇടിമിന്നലും ഉണ്ടായതിനിടെ പന്തലിന് പുറത്ത് കാത്തുനിന്നവര്‍ക്കിടയില്‍ തിരക്കുണ്ടായതാണ് ദുരന്തത്തിന് കാരണമായതെന്നാണ് പ്രാഥമിക വിവരം. പരിക്കേറ്റവരില്‍ ഒരാളുടെ നില ഗുരുതരമാണ്. ചിറ്റരഞ്ജന്‍ അവന്യൂവിന് സമീപമുള്ള വടക്കന്‍ കൊല്‍ക്കത്തയിലെ ചോര്‍ബഗാനില്‍ നടന്ന സമൂഹ ദുര്‍ഗാപൂജയ്‌ക്കിടെയായിരുന്നു അപകടം. സംഘാടകരുടെ അറിയിപ്പിനെത്തുടര്‍ന്ന് ആളുകള്‍ ഒരുമിച്ച് മുന്നോട്ടുനീങ്ങിയതാണ് ദുരന്തത്തിന് കാരണമായതെന്നാണ് പശ്ചിമ ബംഗാള്‍ മുഖ്യമന്ത്രി സുവേന്ദു അധികാരി പറഞ്ഞത്.
മഴ തുടങ്ങിയതോടെ പന്തലിന് പുറത്ത് കാത്തുനിന്നവര്‍ മുന്നോട്ടേക്ക് തള്ളിക്കയറിയെന്നും ഇതിനിടെ ചിലര്‍ റോഡില്‍ വീണതോടെ തിക്കിലും തിരക്കിലും പെടുകയായിരുന്നുവെന്നും മുതിര്‍ന്ന പൊലീസ് ഉദ്യോഗസ്ഥന്‍ വ്യക്തമാക്കി. അപകടവുമായി ബന്ധപ്പെട്ട് ചോര്‍ബഗാന്‍ ദുര്‍ഗാപൂജ സംഘാടക ക്ലബ്ബിലെ ഭാരവാഹികള്‍, സ്വകാര്യ സുരക്ഷാ ജീവനക്കാര്‍, ഡ്യൂട്ടിയിലുണ്ടായിരുന്ന ഉദ്യോഗസ്ഥര്‍ എന്നിവരെ കസ്റ്റഡിയിലെടുത്തതായി മുഖ്യമന്ത്രി അറിയിച്ചു. സംഭവത്തില്‍ വിശദമായ അന്വേഷണം നടത്തുമെന്നും ആവശ്യമായ നടപടികള്‍ സ്വീകരിക്കുമെന്നും മുഖ്യമന്ത്രി വ്യക്തമാക്കി. അപകടത്തില്‍ പരിക്കേറ്റവരെ പ്രവേശിപ്പിച്ച കൊല്‍ക്കത്ത മെഡിക്കല്‍ കോളേജ് ആശുപത്രിയിലെത്തി മുഖ്യമന്ത്രി സുവേന്ദു അധികാരിയും ചീഫ് സെക്രട്ടറി മനോജ് അഗര്‍വാളും സ്ഥിതിഗതികള്‍ വിലയിരുത്തി.
മരിച്ചവരില്‍ ആറുപേരെ തിരിച്ചറിഞ്ഞിട്ടുണ്ട്. ഇവരുടെ കുടുംബാംഗങ്ങളെ ആശുപത്രിയിലെത്തിക്കാനുള്ള നടപടികള്‍ സ്വീകരിച്ചുവരികയാണെന്നും മുഖ്യമന്ത്രി പറഞ്ഞു. ദുരന്തത്തില്‍ മരിച്ചവരുടെ കുടുംബങ്ങള്‍ക്ക് പ്രധാനമന്ത്രിയുടെ ദേശീയ ദുരിതാശ്വാസ നിധിയില്‍നിന്ന് രണ്ട് ലക്ഷം രൂപ വീതം ധനസഹായം നല്‍കുമെന്ന് പ്രധാനമന്ത്രി നരേന്ദ്ര മോദി അറിയിച്ചു. പരിക്കേറ്റവര്‍ക്ക് 50,000 രൂപ വീതവും നല്‍കും. ദുരന്തത്തില്‍ ജീവന്‍ നഷ്ടപ്പെട്ടവരുടെ കുടുംബങ്ങളുടെ ദുഃഖത്തില്‍ പങ്കുചേരുന്നതായും പരിക്കേറ്റവര്‍ വേഗത്തില്‍ സുഖം പ്രാപിക്കട്ടെയെന്നും രാഷ്‌ട്രപതി ദ്രൗപദി മുര്‍മു അനുശോചന സന്ദേശത്തില്‍ പറഞ്ഞു. കേന്ദ്ര ആഭ്യന്തരമന്ത്രി അമിത് ഷായും ദുരന്തത്തില്‍ അനുശോചനം രേഖപ്പെടുത്തി. സംഭവവുമായി ബന്ധപ്പെട്ട് മുഖ്യമന്ത്രി സുവേന്ദു അധികാരിയുമായി സംസാരിച്ചതായും മരിച്ചവരുടെ ആത്മശാന്തിക്കായി പ്രാര്‍ഥിക്കുന്നതായും അദ്ദേഹം എക്‌സിലെ കുറിപ്പില്‍ വ്യക്തമാക്കി. അപകടത്തിന്റെ പശ്ചാത്തലത്തില്‍ ഞായറാഴ്ച പശ്ചിമ ബംഗാളില്‍ നിശ്ചയിച്ചിരുന്ന പരിപാടികള്‍ അമിത് ഷാ റദ്ദാക്കി. പരിക്കേറ്റവരെ സന്ദര്‍ശിക്കാന്‍ ഞായറാഴ്ച ആശുപത്രിയിലെത്തുമെന്നും അദ്ദേഹം അറിയിച്ചു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
അപകടത്തിന്റെ പശ്ചാത്തലത്തില്‍ വലിയ ജനത്തിരക്കുണ്ടാകുന്ന തീം ദുര്‍ഗാപൂജ പന്തലുകള്‍ താല്‍ക്കാലികമായി അടയ്‌ക്കാന്‍ ഭരണകൂടം നിര്‍ദേശം നല്‍കി. കൊല്‍ക്കത്തയില്‍ ഏകദേശം 3,500 പന്തലുകളിലാണ് ദുര്‍ഗാപൂജ ആഘോഷങ്ങള്‍ നടക്കുന്നത്. ദുരന്തവുമായി ബന്ധപ്പെട്ട വിവരങ്ങള്‍ അറിയുന്നതിനായി പശ്ചിമ ബംഗാള്‍ സര്‍ക്കാര്‍ ടോള്‍ ഫ്രീ ഹെല്‍പ്ലൈന്‍ നമ്പറും പുറത്തിറക്കി. 18003455678 എന്ന നമ്പറില്‍ ബന്ധപ്പെടാം. ഗവര്‍ണര്‍ ആര്‍.എന്‍. രവിയും ദുരന്തത്തില്‍ ജീവന്‍ നഷ്ടപ്പെട്ടവരുടെ കുടുംബങ്ങളെ അനുശോചനം അറിയിച്ചു. പരിക്കേറ്റവര്‍ എത്രയും വേഗം സുഖം പ്രാപിക്കട്ടെയെന്നും അദ്ദേഹം ആശംസിച്ചു.
