മഹാദേവിക്കാട് വലിയകുളങ്ങര ക്ഷേത്രത്തില് ദര്ശനം കഴിഞ്ഞു മടങ്ങുന്നവരൊന്നും ശാരദാമ്മയുടെ തട്ടുകടയില് നിന്നും ഒരു കട്ടന് കുടിക്കാതെ വീട്ടിലേക്ക് മടങ്ങാറില്ല. വിഭവങ്ങളുടെ നീണ്ട ലിസ്റ്റോ ചില്ല് അലമാരയില് നിരത്തി വെച്ചിരിക്കുന്ന ആവിപറക്കുന്ന പലഹാരങ്ങളോ ഇവിടെയില്ല…. പകരം കട്ടനൊപ്പം ചൂട് ദോശയും കല്ലില് അരച്ച നല്ല ചമ്മന്തിയുമുണ്ട് കഴിയ്ക്കാന്. പുലര്ച്ചെ അഞ്ചുമണിക്ക് ശാരദാമ്മ തട്ടുകട തുറക്കും പതിനൊന്ന് ആവുമ്പോഴേക്കും തട്ടുകടയിലെ ദോശയും ചമ്മന്തിയും കാലി ആയിട്ടുണ്ടാകും.
കാര്ത്തികപ്പള്ളി മഹാദേവികോട് സന്തോഷ് ഭവനത്തില് ശാരദാമ്മയ്ക്ക് വയസ്സ് എഴുപത്തിയഞ്ചായി എന്നിട്ടും ഇപ്പോഴും പ്രായത്തെ വെല്ലുന്ന ഒറ്റയാള് പോരാട്ടം തുടരുകയാണ് ഈ അമ്മ.
ദോശ ചുടാനും, ചമ്മന്തി അരക്കാനും, ആവശ്യക്കാര്ക്ക് നല്കാനും എല്ലാം ശാരദാമ്മ മാത്രമാണുള്ളത്. വര്ഷങ്ങള് ഏറെയായി മഹാദേവിക്കാട് വലിയകുളങ്ങര ക്ഷേത്രത്തിനു എതിര്വശത്തായുള്ള ഈ തട്ടുകട തുടങ്ങിയിട്ട്. ആകെ മൂന്ന് പേര്ക്ക് ഇരിക്കാവുന്ന ബെഞ്ചും അതിനോടു ചേര്ന്നുളള മേശയും മാത്രമാണ് ഇവിടെയുള്ളത്. കൂടാതെ ഇവിടെ ഗ്യാസ് അടുപ്പോ കറന്റ് അടുപ്പോ ഒന്നും തന്നെയില്ല. വിറകടുപ്പിലാണ് ശാരദാമ്മയുടെ പാചകം. പ്രായം ഇത്രയധികം ആയിട്ടും കഷ്ടപ്പാടുകളില് നിന്ന് കയറാനാണ് ശാരദാമ്മ ഇപ്പോഴും തട്ടുകട നടത്തുന്നത്.
ഭര്ത്താവിനൊപ്പം 28 വര്ഷം ഹോട്ടല് നടത്തിയിരുന്നു ശാരദാമ്മ. ഭര്ത്താവ് മരിച്ച ശേഷം രണ്ട് പെണ്മക്കളും ഒരു മകനും മാത്രമായി. പിന്നീട് പെണ് മക്കളെ വിവാഹം കഴിച്ചയച്ചു. രണ്ടു വര്ഷം മുന്പേ മകന് കൂടി മരിച്ചതോടെ കഷ്ടപ്പാടുകള് ഏറെയായി. മകന്റെ ഭാര്യയും മക്കളും ശാരദാമ്മയുടെ കൂടെയാണ് താമസിക്കുന്നത്. പ്രായത്തിന്റെ ബുദ്ധിമുട്ടുകള് ഏറെ വലയ്ക്കുന്നുണ്ട് എങ്കിലും ഈശ്വരാന്റെ അനുഗ്രഹത്താലാണ് ഇങ്ങനെ മുന്നോട്ടു പോകാന് സാധിക്കുന്നത് എന്നാണ് ശാരദാമ്മ പറയുന്നത്.
