ന്യൂഡൽഹി: രാമായണം ടെലിവിഷൻ പരമ്പരയിലൂടെ പ്രശ്സ്തനായ നടൻ അരുൺ ഗോവിൽ ബിജെപിയിൽ ചേർന്നു. സീരിയലിൽ രാമനായായിരുന്നു താരം എത്തിയത്. ഡൽഹിയിലെ ബിജെപി ആസ്ഥാനത്തെത്തിയാണ് അദ്ദേഹം പാർട്ടി അംഗത്വം സ്വീകരിച്ചത്. അഞ്ച് നിയമസഭാ തെരഞ്ഞെടുപ്പ് അടുത്തിരിക്കെ അരുൺ ഗോവിലിന്റെ പാർട്ടി പ്രവേശനം നേട്ടമാകുമെന്നാണ് ബിജെപിയുടെ വിലയിരുത്തൽ.
തെരഞ്ഞെടുപ്പിൽ അരുൺ ഗോവിൽ സ്ഥാനാർത്ഥിയാകാനും സാദ്ധ്യതയുണ്ട്. പണ്ട് തനിക്ക് രാഷ്ട്രീയം അറിയില്ലായിരുന്നു. പക്ഷെ ഇന്ന് മോദി രാജ്യത്തിന്റെ പരമാധികാരം ഏറ്റെടുത്ത ശേഷം രാജ്യത്തിന്റെ നിർവ്വചനം മാറിയെന്ന് അരുൺ ഗോവിൽ പറഞ്ഞു. പാർട്ടി നൽകുന്ന എന്ത് കടമയും നിർവ്വഹിക്കാൻ തയ്യാറാണെന്നും അദ്ദേഹം അറിയിച്ചു. ബിജെപി ദേശീയ ജനറൽ സെക്രട്ടറി അരുൺ സിംഗിന്റെ സാന്നിദ്ധ്യത്തിലാണ് അദ്ദേഹം പാർട്ടിയിൽ ചേർന്നത്.
നേരത്തെ രാമായണം സീരിയലിൽ സീതയായെത്തിയ ദീപിക ചിക്ലിയ ബിജെപിയിൽ ചേർന്നിരുന്നു. പുറകെ ഹനുമാനായെത്തിയ ദാര സിംഗ്, രാവണനായെത്തിയ അരവിന്ദ് ത്രിവേദി എന്നിവരും പാർട്ടിയിൽ ചേർന്നിരുന്നു.
കൊറോണയുടെ പശ്ചാത്തലത്തിൽ ലോക്ഡൗൺ ഏർപ്പെടുത്തിയ സമയത്ത് പ്രേക്ഷകരുടെ ആവശ്യത്തെ തുടർന്ന് രാമായണം പരമ്പര പുനഃസംപ്രേക്ഷണം ചെയ്തിരുന്നു. രാമാനന്ദ് സാഗറാണ് രാമായണം സംവിധാനം ചെയ്തത്. വലിയ സ്വീകാര്യതയായിരുന്നു ലോക്ഡൗൺ സമയത്തും സീരിയലിന് ലഭിച്ചത്.
