അന്തരിച്ച തമിഴ്നാട് മുൻ മുഖ്യമന്ത്രി ജയലളിതയുടെ ജീവിതകഥ പറയുന്ന തലൈവി സിനിമയുടെ ട്രെയിലർ പുറത്തിറങ്ങി. ചിത്രത്തിലെ നായികയും ദേശീയ അവാർഡ് ജേതാവുമായ കങ്കണ റണാവത്ത് തന്നെയാണ് ട്രെയിലർ പുറത്തിറക്കിയിരിക്കുന്നത്. കങ്കണയുടെ ജന്മദിനത്തിൽ തന്നെയാണ് ട്രെയിലർ ഇറക്കിയിരിക്കുന്നതെന്ന പ്രത്യേകതയുമുണ്ട്. സമൂഹ മാദ്ധ്യമങ്ങളിൽ വലിയ സ്വീകാര്യതയാണ് ഇതിന് ലഭിച്ചിരിക്കുന്നത്.
അഭിനയത്തിൽ നിന്ന് രാഷ്ട്രിയത്തിലേക്ക് ഇറങ്ങിയ ജയലളിതയുടെ ജീവിതം പറയുന്ന ചിത്രത്തിന്റെ ട്രെയിലറിൽ സിനിമാ താരമായും രാഷ്ട്രീയക്കാരിയായും എത്തുന്ന ഭാഗങ്ങളുണ്ട്. എംജിആറുമായുള്ള ബന്ധവും അദ്ദേഹത്തിന്റെ മരണവും തുടർന്നുണ്ടാകുന്ന സംഭവവികാസങ്ങളുമാണ് ട്രെയിലറിലുള്ളത്. ചിത്രത്തിൽ എംജിആറായി അരവിന്ദ് സ്വാമിയാണ് വേഷമിടുന്നത്. പ്രകാശ് രാജ്, ജിഷു സെൻഗുപ്ത, ഭാഗ്യശ്രീ തുടങ്ങിയവരും ശ്രദ്ധേയ വേഷത്തിൽ ചിത്രത്തിലെത്തുന്നുണ്ട്.
ബാഹുബലിക്കും മണികര്ണികയ്ക്കും വേണ്ടി തിരക്കഥയെഴുതിയ കെആര് വിജയേന്ദ്ര പ്രസാദ് ആണ് തലൈവിക്കും തിരക്കഥ ഒരുക്കുന്നത്. ഹിന്ദി, തമിഴ്, തെലുങ്ക് എന്നിങ്ങനെ വിവിധ ഭാഷകളിൽ റിലീസിന് തയ്യാറെടുക്കുന്ന ചിത്രം എഎൽ വിജയ് ആണ് സംവിധാനം ചെയ്യുന്നത്. വൈബ്രി, കർമ്മ മീഡിയ എന്നിവയുടെ ബാനറിൽ വിഷ്ണു വർധൻ ഇന്ദൂരി, ശൈലേഷ് ആർ സിംഗ് എന്നിവർ ചേർന്നാണ് ചിത്രം നിർമ്മിക്കുന്നത്. നീരവ് ഷാ ഛായാഗ്രഹണവും ജി വി പ്രകാശ് സംഗീതവും നിർവ്വഹിച്ചിരിക്കുന്നു.
ഏപ്രിൽ 23 ന് ചിത്രം തിയേറ്ററുകളിൽ എത്തുമെന്നാണ് അണിയറ പ്രവർത്തകർ അറിയിച്ചിരിക്കുന്നത്.
