ഭക്ഷണം കഴിഞ്ഞാല് ഒരു സുലൈമാനി ചില ആളുകള്ക്ക് നിര്ബന്ധമാണ്. ശരീരത്തിന് ഉണര്വ് നല്കാനും ദഹനത്തെ എളുപ്പമാക്കാനും സഹായിക്കുന്ന ഒരു പാനീയം കൂടിയാണ് സുലൈമാനി. എന്നാല് ഒരു ഗ്ലാസ് കട്ടന് ചായയും ഒരു സ്പൂണ് ചെറുനാരങ്ങ നീരും മാത്രം മതി മിക്ക ആളുകള്ക്കും സുലൈമാനി തയ്യാറാക്കാന്, എന്നാല് സാധാരണ രീതിയില് തയ്യാറാക്കുന്നതില് നിന്നും വ്യത്യസ്തമായി കാഴ്ചയിലും സ്വാദിലും ഗുണത്തിലും വേറിട്ടു നില്ക്കുന്ന ഒരു സുലൈമാനി എങ്ങനെ തയ്യാറാക്കാം എന്ന് നോക്കാം. അതിനായി ആദ്യം രണ്ട് ഏലക്ക, ഒരു കഷ്ണം കറുവപട്ട, നാല് ഗ്രാമ്പൂ, ഒരു കഷ്ണം ഇഞ്ചി എന്നിവ നന്നായി ചതച്ചെടുക്കുക.
പിന്നീട് രണ്ട് ഗ്ലാസ് വെള്ളം നന്നായി തിളപ്പിക്കുക. വെളളം തിളച്ചു വരുമ്പോള് അതിലേക്ക് ചതച്ചു വെച്ച മിശ്രിതം ചേര്ത്ത് നന്നായി തിളപ്പിക്കുക. അതേ സമയം മറ്റൊരു പാത്രത്തില് അര ഗ്ലാസ് വെളളം വെച്ച് നന്നായി തിളപ്പിക്കുക. വെളളം തിളച്ചു വരുമ്പോള് അതിലേക്ക് ഒരു സ്പൂണ് ചായപ്പൊടി ചേര്ത്തു കൊടുക്കുക. ശേഷം ഇതുരണ്ടും ചൂടോടെ അരിച്ചെടുക്കുക. പിന്നീട് ഒരു ഗ്ലാസില് നമ്മുടെ മധുരത്തിന് അനുസരിച്ച് പഞ്ചസാരയിട്ട് അതിലേക്ക് മുക്കാല് ഭാഗത്തോളം ചതച്ച മിശ്രിതങ്ങള് ഇട്ട് തയ്യാറാക്കിയ ലായനി ഒഴിച്ച്, നന്നായി ഇളക്കി കൊടുക്കുക.
ശേഷം അതിനു മുകളിലേക്ക് നല്ല കടുപ്പത്തിലുളള കട്ടന്ചായ തുള്ളി തുള്ളിയായി ഒഴിച്ചു കൊടുക്കുക. അപ്പോള് മുകളില് കട്ടന് ചായയുടെ നിറവും താഴേക്ക് അതിന്റെ നിറം ആഴ്ന്നിറങ്ങി ഓറഞ്ച് നിറമായി മാറുന്നു. ഓരോ ലെയറായി കാഴ്ചയില് തന്നെ നല്ല ഭംഗിയില് കാണാം. ഭക്ഷണ ശേഷമോ രാത്രി കിടക്കുന്നതിനു മുന്പോ സുലൈമാനി കുടിക്കുന്നത് വളരെ നല്ലതാണ്. ദഹന സംബന്ധമായ പ്രശ്നങ്ങളും ഗ്യാസ്ട്രബിളും ഇല്ലാതാക്കാന് ഇത് സഹായിക്കുന്നു.
