പടച്ചോനേ ഇങ്ങള് കാത്തോളീ….. എന്ന ഡയലോഗ് കേട്ടാല്‍ എത്ര തിരക്കിട്ട് പോകുന്നവരും ഒന്ന് നോക്കും. എത്ര വട്ടം കണ്ടാലും വീണ്ടും കാണാന്‍ ആഗ്രഹിക്കുന്ന ഒരു സീനാണ് വെള്ളാനകളുടെ നാട് എന്ന ചിത്രത്തിലെ കുതിരവട്ടം പപ്പു പൊങ്ങച്ചം പറയുന്ന ഈ സീന്‍. ഇത് കേട്ട് ചിരിക്കാത്തവരും കുറവായിരിക്കും. എന്നാല്‍ ഇപ്പോള്‍ സോഷ്യല്‍ മീഡിയയില്‍ വൈറലായി കൊണ്ടിരിക്കുന്നത് ആരെയും ചിരിപ്പിക്കുന്ന ഈ പ്രശസ്തമായ രംഗത്തിന്റെ വളരെ രസകരമായ ഒരു അനിമേഷന്‍ വീഡിയോ ആണ്. കഴിഞ്ഞ കുറച്ചു ദിവസങ്ങളായി ആളുകളുടെ വാട്‌സ്ആപ്പ് സ്റ്റാറ്റസുകളിലും ഫേസ്ബുക്ക് പ്രൊഫൈലുകളുലും ഇന്‍സ്റ്റാഗ്രാം സ്റ്റോറുകളിലുമായി നിറഞ്ഞു നില്‍ക്കുകയാണ് ഈ അനിമേഷന്‍ വീഡിയോ.
കാനഡയില്‍ അനിമേഷന്‍ രംഗത്ത് ജോലി ചെയ്യുന്ന അജു മോഹനാണ് വെള്ളനാകളുടെ നാട് എന്ന ചിത്രത്തിലെ താമരശ്ശേരി ചുരം എന്ന പൊങ്ങച്ചം പറച്ചില്‍ രംഗത്തിനായി അനിമേഷന്‍ തയ്യാറാക്കിയത്. രസകരമായി തയ്യാറാക്കിയ ഈ വീഡിയോ ഇതിനോടകം തന്നെ സമൂഹ മാദ്ധ്യമങ്ങളില്‍ സൂപ്പര്‍ ഹിറ്റായി മാറുകയും ചെയ്തു. കുതിരവട്ടം പപ്പു എന്ന അതുല്യ കലാകാരനെ ഓര്‍മ്മിക്കുമ്പോള്‍ ആദ്യം മനസ്സില്‍ വരുന്ന ഒരുപിടി ഹാസ്യ കഥാപാത്രങ്ങളില്‍ മുന്നില്‍ നില്‍ക്കുന്ന ഒന്നാണ് വെള്ളാനകളുടെ നാട് എന്ന ചിത്രത്തിലെ സുലൈമാന്‍ എന്ന കഥാപാത്രം.
ചിത്രത്തില്‍ താമരശ്ശേരി ചുരം ഇറങ്ങിയ കഥ പറഞ്ഞപ്പോള്‍ പ്രേക്ഷക മനസ്സുകളില്‍ പല രൂപത്തില്‍ ആ കഥ തെളിഞ്ഞു. എന്നാല്‍ ആനിമേഷനിലൂടെ ആ കഥയെ രസകരമായി ദൃശ്യവത്കരിച്ചിരിക്കുകയാണ് അജു മോഹന്‍. കുതിരവട്ടം പപ്പുവിന്റെ മകന്‍ ബിനു പപ്പു അടക്കം നിരവധിപ്പേരാണ് വീഡിയോ പങ്കുവെച്ചത്. കൂടാതെ മണിച്ചിത്രത്താഴ് എന്ന് ചിത്രത്തിലെ സൂപ്പര്‍ ഹിറ്റ് ഗാനത്തിന് ആനിമേഷനിലൂടെ വേറിട്ട ക്ലൈമാക്സ് ഒരുക്കിയും അജു മോഹന്‍ സൈബര്‍ ഇടങ്ങളില്‍ കൈയ്യടി നേടിയിരുന്നു.
