സൂപ്പര് മാര്ക്കറ്റില് നിന്ന് വാങ്ങിയ സാധനങ്ങള്ക്കിടയില് ഒരു പാമ്പിനെ കണ്ടാലോ എന്തായിരിക്കും സ്ഥിതി. ആരും പേടിക്കും. അത്തരത്തില് ഒരു വാര്ത്തയാണ് ഇപ്പോള് സോഷ്യല് മീഡിയയില് വൈറലായി കൊണ്ടിരിക്കുന്നത്. സൂപ്പര് മാര്ക്കറ്റില് നിന്ന് സാധനങ്ങള് വാങ്ങി വീട്ടിലെത്തിയപ്പോള് ചീര പായ്ക്കറ്റില് നിന്നും ലഭിച്ചത് ഒരു പാമ്പിനെ. ഓസ്ട്രേലിയയിലെ സിഡ്നിയിലെ ഒരു സൂപ്പര് മാര്ക്കറ്റില് നിന്ന് സാധനങ്ങള് വാങ്ങിയെത്തിയ ദമ്പതികള്ക്ക് ചീര പായ്ക്കറ്റില് നിന്നും പാമ്പിനെ ലഭിച്ചത്.
അലക്സാണ്ടര് വൈറ്റും ഭാര്യ അമേലി നീറ്റും തസിഡ്നിയിലെ അല്ഡി സൂപ്പര് മാര്ക്കറ്റില് നിന്ന് വാങ്ങിയ ചീര പായ്ക്കറ്റിനുള്ളിലാണ് കൊടും വിഷമുള്ള പാമ്പിന് കുഞ്ഞിനെ കണ്ടെത്തിയത്. 20 സെന്റിമീറ്ററോളം നീളമുള്ള പാമ്പിന് കുഞ്ഞ് സൂപ്പര്മാര്ക്കറ്റിലെ ചീര പായ്ക്കറ്റിനുള്ളില് കിടന്ന് ഉറങ്ങുകയായിരുന്നു. ഇവിടെ നിന്ന് ചീര വാങ്ങിയ വൈറ്റ്, പാമ്പിന് കുഞ്ഞുമായി 10 മിനിറ്റ് നേരം സൈക്കിളില് യാത്ര ചെയ്താണ് വീട്ടിലെത്തിയത്. ഈ സമയത്താണ് പാമ്പ് ഉറക്കമെഴുന്നേല്ക്കുന്നതും പായ്ക്കറ്റിനുള്ളില് കൂടി ഇഴയാന് ആരംഭിച്ചതും.
വീട്ടിലെത്തി വാങ്ങിയ സാധനങ്ങളുടെ പായ്ക്കറ്റ് അഴിക്കാന് ആരംഭിച്ചതോടെയാണ് പായ്ക്കറ്റിനുള്ളിലെ പാമ്പിന് കുഞ്ഞ് ദമ്പതികളുടെ ശ്രദ്ധയില്പ്പെട്ടത്. ഉടന് തന്നെ ഇവര് വന്യജീവി റെസ്ക്യു സംഘടനയായ ഡബ്ള്യുഐആര്ഇഎസി (വൈല്ഡ്ലൈഫ് ഇന്ഫര്മേഷന്, റെസ്ക്യൂ, എഡ്യൂക്കേഷന് സര്വീസ്) നെ വിവരം അറിയിക്കുകയായിരുന്നു. സ്ഥലത്തെത്തിയ സംഘമാണ് ഇത് ഉഗ്രവിഷമുള്ള ഇനത്തില്പ്പെട്ട പാമ്പാണെന്ന് പറയുന്നത്. തുടര്ന്ന് പാമ്പിനെ സംഘം കൊണ്ട് പോവുകയും ചെയ്തു. അതേസമയം പാമ്പ് എങ്ങനെ പാക്കറ്റിനുള്ളില് എത്തി എന്ന കാര്യത്തില് ഇപ്പോഴും വ്യക്തതയില്ല.
Comments