സിഡ്‌നി: മുന്‍ ഓസ്‌ട്രേലിയന്‍ ക്രിക്കറ്റ് താരം സ്റ്റുവര്‍ട്ട് മക്ഗില്ലിനെ തട്ടിക്കൊണ്ടു പോയ സംഭവത്തില്‍ കാമുകിയുടെ സഹോദരന്‍ അറസ്റ്റില്‍. മക്ഗില്ലിന്റെ കാമുകി മരിയ ഒ മെഗാഹെറിന്റെ സഹോദരന്‍ മാരിനോ സോറ്റിറോപൗലോസ് ആണ് അറസ്റ്റിലായത്. മാരിനോ അടക്കം നാല് പേരെയാണ് ന്യൂ സൗത്ത് വെയ്ല്‍സ് പോലീസ് അറസ്റ്റ് ചെയ്തത്.
ഇക്കഴിഞ്ഞ ഏപ്രില്‍ പതിനാലിന് രാത്രി പടിഞ്ഞാറന്‍ സിഡ്‌നിയിലെ ബ്രിഗ്ലിയില്‍ വച്ചായിരുന്നു മക്ഗില്ലിനെ നാലംഗ സംഘം തോക്കുചൂണ്ടി തട്ടിക്കൊണ്ടുപോയത്. നഗരത്തിന് പുറത്തെ അജ്ഞാത കേന്ദ്രത്തിലേക്ക് കൊണ്ടുപോയ അക്രമികള്‍ മക്ഗില്ലിനെ മര്‍ദിക്കുകയും വിട്ടയക്കാന്‍ മോചനദ്രവ്യം ആവശ്യപ്പെടുകയുമായിരുന്നു. ഒരു മണിക്കൂറിന് ശേഷം അവര്‍ മക്ഗില്ലിനെ വിട്ടയക്കുകയും ചെയ്തു. ആക്രമണത്തില്‍ കാര്യമായി പരിക്കേറ്റില്ലെങ്കിലും, ഭയം മൂലം ആറ് ദിവസം കഴിഞ്ഞാണ് മക്ഗില്‍ സംഭവം പോലീസില്‍ റിപ്പോര്‍ട്ട് ചെയ്യുന്നത്.
സംഭവവുമായി ബന്ധപ്പെട്ട് നടത്തിയ വിശദമായ അന്വേഷണത്തിനൊടുവില്‍ അക്രമികളെ തിരിച്ചറിഞ്ഞ പോലീസ് 27, 29 42, 46 പ്രായമുള്ള നാലു പേരുടെ അറസ്റ്റ് ഇന്ന് രേഖപ്പെടുത്തിയതായി വാര്‍ത്താക്കുറിപ്പില്‍ വ്യക്തമാക്കുകയായിരുന്നു. ചോദ്യം ചെയ്യലിന് ശേഷം പ്രതികളെ കോടതിയില്‍ ഹാജരാക്കി. ലെഗ് സ്പിന്നറായ മക്ഗില്‍ ഓസ്‌ട്രേലിയക്കായി 44 ടെസ്റ്റിലും മൂന്ന് ഏകദിനങ്ങളിലും കളിച്ചിട്ടുണ്ട്. ടെസ്റ്റില്‍ 208ഉം ഏകദിനത്തില്‍ ആറ് വിക്കറ്റും വീഴ്‌ത്തി. 2008ല്‍ രാജ്യാന്തര ക്രിക്കറ്റില്‍ നിന്ന് വിരമിച്ച 50കാരനായ മക്ഗില്‍ 2011ല്‍ ബിഗ് ബാഷ് ലീഗില്‍ കളിച്ചിരുന്നു.
