ബീജിംഗ്: സ്വതന്ത്രപരമാധികാര പ്രഖ്യാപനം നടത്തി മുന്നേറുന്ന തായ്വാന് വേണ്ടിയുള്ള അമേരിക്കയുടെ ഇടപെടലിനെതിരെ വീണ്ടും ചൈന. എത്രയും വേഗം തായ്‌വാനെ പിന്തുണയ്‌ക്കുന്ന നയങ്ങള്‍ തിരുത്തണമെന്നാണ് ചൈന ആവശ്യപ്പെടുന്നത്. ഇതൊരു മുന്നറിയിപ്പായി കാണണമെന്ന ഭീഷണിയുടെ സ്വരമാണ് ചൈനയുടെ പ്രസ്താവനയിലുള്ളത്. ലോകാരോഗ്യസംഘടനയില്‍ തായ്വാന് ലഭിച്ചിരിക്കുന്ന പ്രമുഖ സ്ഥാനത്തെ അമേരിക്ക ഔദ്യോഗികമായി പിന്തുണച്ചതോടെയാണ് ബീജിംഗ് വിദേശകാര്യ മന്ത്രാലയത്തിന്‍റെ പ്രസ്താവന വന്നത്.
‘ലോകാരോഗ്യ സംഘടനയുടെ നിരീക്ഷക രാജ്യങ്ങളുടെ പട്ടികയില്‍ തായ്‌വാനെ ഉള്‍പ്പെടുത്തിയ നയത്തെ ബീജിംഗ് ശക്തമായി എതിര്‍ക്കുന്നു. ചൈനയുടെ ഭാഗമായിരിക്കേ സ്വതന്ത്ര്യരാജ്യമാണെന്ന് മറ്റുള്ളവര്‍ ധരിക്കുന്നത് വസ്തുതാപരമായി വലിയ തെറ്റാണ്. ഇത് ലോക വേദികളില്‍ നിരന്തരം ചൂണ്ടിക്കാണിച്ചതാണ്. എന്നാല്‍ അമേരിക്കന്‍ സറ്റേറ്റ് സെക്രട്ടറിയുടെ ഭാഗത്തുനിന്നും തായ്വാന് വേണ്ടി നടത്തിയിരിക്കുന്ന പ്രസ്താവനയെ എതിര്‍ക്കുന്നു. ചൈനയുടെ പരമാധികാരത്തെ തകര്‍ക്കാന്‍ ഒരു ചെറു പ്രദേശം നടത്തുന്ന നിയമവിരുദ്ധ പ്രവര്‍ത്തനങ്ങളെ പിന്തുണയ്‌ക്കുന്നതാണ് അമേരിക്കയുടെ നയം. ഈ ശ്രമത്തെ ഞങ്ങള്‍ ശക്തിയുക്തം എതിര്‍ക്കുകയും തള്ളുകയും ചെയ്യുന്നു.’ ബീജിംഗ് വിദേശകാര്യവക്താവ് ഹുവാ ചുംഗ്നിംഗ് പ്രസ്താവനയില്‍ പറഞ്ഞു.
ചൈനയുടെ പൊതുതാല്‍പ്പര്യത്തെ എതിര്‍ക്കാനോ തടയാനോ തായ്വാന് യാതൊരു വിധ അധികാരവും നല്‍കിയിട്ടില്ല. അതിനാല്‍ തന്നെ അത്തരം ശ്രമങ്ങളോട് ഒരു വിട്ടുവീഴ്ചയു മില്ലാത്ത സമീപനം സ്വീകരിക്കുമെന്നും ചുംഗ്നിംഗ് പറഞ്ഞു.
എന്നാല്‍ ലോകാരോഗ്യസംഘടനയുടെ കാഴ്ചപ്പാടില്‍ മാതൃകാപരമായി പ്രവര്‍ത്തിക്കുന്ന രാജ്യമാണ് തായ്വാന്. കൊറോണ മഹാമാരി സമയത്തെ തായ്വാന് ഗവേഷണ രംഗത്ത് നല്‍കിയ സേവനം ഏവരും തിരിച്ചറിയുന്നു. അതിനാല്‍ തന്നെ തായ്വാന് നല്‍കിയിരിക്കുന്ന സ്ഥാനം തികച്ചും നീതികരിക്കത്തക്കതാണെന്ന് കഴിഞ്ഞ ദിവസം അമേരിക്കന്‍ സ്റ്റേറ്റ് സെക്രട്ടറി ആന്‍റണി ബ്ലിങ്കന്‍ അഭിനന്ദന സന്ദേശമായി പറഞ്ഞിരുന്നു.
