ഉത്സവപറമ്പുകളില് നമ്മെ വരവേല്ക്കുന്ന സ്വാദിഷ്ടമായ ഒരു വിഭവമാണ് ശര്ക്കര ജിലേബി. ഉത്സവ പറമ്പിലൂടെ കഥ പറഞ്ഞു നടക്കുന്നതിനിടയില് നല്ല തിളച്ച എണ്ണയിലിട്ട് വറുത്തുകോരുന്ന ശര്ക്കര ജിലേബിയിലേക്ക് കണ്ണോടിക്കാത്തവര് ആരാണുള്ളത്. ഒരിക്കലെങ്കിലും അത് വാങ്ങി കഴിച്ചിട്ടുള്ളവരുടെ നാവിന് തുമ്പില് നിന്നും അത്ര പെട്ടന്നൊന്നും ആ രുചി പോകില്ല. എന്നാല് ശര്ക്കര ജിലേബി വളരെ എളുപ്പം നമുക്ക് വീട്ടില് തന്നെ ഉണ്ടാക്കാം, വെറും രണ്ട് ചേരുവകള് മാത്രം ഉപയോഗിച്ചു കൊണ്ട്.
എങ്ങിനെയെന്ന് നോക്കാം. ഇതിനായി ആദ്യം ഉഴുന്ന് അഞ്ചു മണിക്കൂര് വെള്ളത്തില് കുതിര്ത്ത് വയ്ക്കുക. ശേഷം വളരെ കുറച്ച് വെള്ളം മാത്രം ഒഴിച്ച് മിക്സിയിലോ ഗ്രൈന്ഡറിലോ നന്നായി അരച്ചെടുക്കുക. അരച്ചെടുത്ത മാവ് ഒരു പെപ്പിംഗ് ബാഗിലേക്ക് ഒഴിക്കുക. ശര്ക്കര കുറച്ച് വെള്ളം ഒഴിച്ച് തിളപ്പിച്ച് ശര്ക്കരപ്പാനി തയ്യാറാക്കുക. അതിലേക്ക് ഒരു നുള്ള് ഉപ്പു ചേര്ക്കാം. പിന്നീട് തയ്യാറാക്കിയ ശര്ക്കരപ്പാനി അരിച്ചെടുക്കുക.
പെപ്പിംഗ് ബാഗില് മാവ് നിറച്ച് മുകള്ഭാഗം റബ്ബര് ബാന്ഡ് ഉപയോഗിച്ച് നല്ല രീതിയില് ടൈറ്റ് ചെയ്തതിനു ശേഷം അഗ്രഭാഗം ചെറുതായി കട്ട് ചെയ്തു കൊടുക്കുക. പിന്നീട് ഒരു ചട്ടിയില് എണ്ണ ചൂടാക്കി അതിലേക്ക് മാവ് ജിലേബിയുടെ ആകൃതിയില് ഒഴിച്ചു കൊടുക്കുക. നടുവില് നിന്ന് തുടങ്ങി ചുറ്റിച്ചെടുക്കുക. ചെറിയ തീയില് വേവിക്കുക. വെന്തു കഴിയുമ്പോള് ഒരു മിനിറ്റോളം ശര്ക്കരപ്പാനിയില് ഇട്ട് വയ്ക്കുക. സ്വാദിഷ്ടമായ ശര്ക്കര ജിലേബി തയ്യാര്.
