ചണ്ഡീഗഡ് : പഞ്ചാബിൽ ബിജെപി നേതാവിന്റെ കൃഷിയിടത്തിൽ ട്രാക്ടർ കയറ്റി കൃഷി നശിപ്പിച്ച് സംയുക്ത കിസാൻ മോർച്ച പ്രവർത്തകർ. ബർനാല ജില്ലയിലെ ധനൗല ഗ്രാമത്തിലെ ബിജെപി നേതാവ് ഹർജീത് സിംഗിന്റെ കൃഷിയാണ് പ്രതിഷേധക്കാർ നശിപ്പിച്ചത്. ലക്ഷക്കണക്കിന് രൂപയുടെ നഷ്ടം സംഭവിച്ചതായി ഹർജീത് സിംഗ് പറഞ്ഞു.
വെള്ളിയാഴ്ച അർദ്ധരാത്രിയോടെയാണ് കൃഷിസ്ഥലം കലാപകാരികൾ ആക്രമിച്ചത്. സംഘടിച്ചെത്തിയ പ്രവർത്തകർ കൃഷി സ്ഥലത്തുകൂടി ട്രാക്ടർ ഓടിച്ച് കയറ്റുകയായിരുന്നു. ഒന്നരയേക്കർ സ്ഥലത്തെ വിളകളും, ഞാറുകളും അക്രമികൾ പൂർണമായും നശിപ്പിച്ചു.
സംഭവത്തിൽ ഹർജീത് സിംഗ് പോലീസിൽ പരാതി നൽകി. കുറ്റക്കാർക്കെതിരെ ഉടൻ നടപടി സ്വീകരിക്കുമെന്ന് പോലീസ് അറിയിച്ചു. ബിജെപി നേതാവായതിന്റെ പേരിലായിരുന്ന നീക്കമെന്നാണ് വിവരം.
