തിരുവനന്തപുരം : രാജ്യദ്രോഹക്കേസിൽ പോലീസ് അന്വേഷണം നേരിടുന്ന ഐഷ സുൽത്താനയ്ക്ക് പിന്തുണയുമായി സിപിഎം. ഐഷയെ അകാരണമായി ദ്രോഹിക്കുന്നതിനെതിരെ സിപിഎം പ്രമേയം പാസാക്കി. മുൻ ധനമന്ത്രി തോമസ് ഐസക്കാണ് ട്വിറ്ററിലൂടെ വിവരം പുറത്തുവിട്ടത്.
ടിവി ചർച്ചയിൽ രാജ്യവിരുദ്ധ പരാമർശം നടത്തിയെന്നാരോപിച്ച് ഐഷ സുൽത്താനയെ നിരന്തരം ഉപദ്രവിക്കുന്നതിനെതിരെ സിപിഎം പ്രമേയം പാസാക്കി. അവരുടെ ഫ്ലാറ്റ് റെയ്ഡ് ചെയ്തു. ലാപ്ടോപ്പ് പിടിച്ചെടുത്തു. വ്യാജരേഖകൾ വെക്കാനുള്ള സാദ്ധ്യത തള്ളിക്കളയാനാകില്ലെന്നും തോമസ് ഐസക്ക് ട്വീറ്റ് ചെയ്തു. നേരത്തെ ഡിവൈഎഫ്ഐയും ഐഷയ്ക്ക് പിന്തുണയുമായി രംഗത്തെത്തിയിരുന്നു.
രാജ്യദ്രോഹക്കേസുമായി ബന്ധപ്പെട്ട് ഐഷ സുൽത്താനക്കെതിരെ നടക്കുന്ന അന്വേഷണത്തെ അപലപിക്കുന്നതാണ് സിപിഎമ്മിന്റെ പ്രമേയം. കേന്ദ്രസർക്കാർ ലക്ഷദ്വീപിൽ ബയോവെപ്പണായി കൊറോണയെ ഉപയോഗിച്ചെന്നായിരുന്നു ഐഷയുടെ പരാമർശം. പിന്നീട്ൈഷ ഇതിൽ മാപ്പപേക്ഷിച്ചെങ്കിലും വിവിധ സ്റ്റേഷനുകളിൽ വന്ന പരാതിയിൽ കേസെടുക്കുകയായിരുന്നു.
