ന്യൂഡൽഹി: ഒളിംപിക്സില് വെള്ളി മെഡല് നേടി ഇന്ത്യയ്ക്ക് അഭിമാനമായി മാറിയ ഭാരോദ്വഹന താരം മീരാബായ് ചാനുവിന് വ്യത്യസ്തമായ ഒരു സമ്മാനവുമായി ഡോമിനോസ് ഇന്ത്യ. ജീവിതകാലം മുഴുവന് ചാനുവിന് സൗജന്യമായി പിസ്സ നല്കുമെന്നാണ് ഡൊമിനോസ് ഇന്ത്യയുടെ വാഗ്ദാനം. താരത്തെ അഭിനന്ദിച്ചുകൊണ്ടുള്ള ട്വീറ്റിലാണ് ഡോമിനോസ് ഇന്ത്യയുടെ പ്രഖ്യാപനം.
ഡൊമിനോസിന്റെ ഇംഫാല് ബ്രാഞ്ച് ചാനുവിന്റെ കുടുംബത്തിനും പ്രിയപ്പെട്ടവര്ക്കും പിസ്സ എത്തിച്ചുകൊണ്ടായിരുന്നു പ്രഖ്യാപനം നടത്തിയത്. ഈ അത്ഭുതകരമായ നിമിഷം പങ്കിടാൻ കഴിഞ്ഞതിൽ ഞങ്ങൾ സന്തോഷിക്കുന്നു. നൂറു കോടി ജനങ്ങളുടെ മുഖത്ത് പുഞ്ചിരി വിരിയിച്ച അവളുടെ വലിയ വിജയം കുടുംബത്തിനൊപ്പം ഞങ്ങളും ആഘോഷിക്കുന്നു എന്നാണ് ഡൊമിനോസ് ഇന്ത്യ ട്വീറ്റ് ചെയ്തത്. കുടുംബാംഗങ്ങള്ക്ക് പിസ്സ നല്കുന്ന ചിത്രവും ട്വിറ്ററില് പങ്കുവെച്ചിട്ടുണ്ട്.
പിസ്സ വളരെ ഇഷ്ടമുള്ള ഭക്ഷണമാണെന്ന് ചാനു വ്യക്തമാക്കിയിരുന്നു. ഇതോടെയാണ് ഡൊമിനോ ചാനുവിന് പിസ നൽകാൻ തീരുമാനിച്ചത്. നാലു വര്ഷത്തോളമായി സാലഡുകളാണ് ഭക്ഷണത്തില് പ്രധാനം, ഇനിയിപ്പോള് ഐസ്ക്രീം, കേക്ക്…ഇതുപോലെ എന്തെങ്കിലും കഴിക്കാന് ആഗ്രഹിക്കുന്നുണ്ടോ എന്ന ചോദ്യത്തിനു മറുപടിയായാണ് ആദ്യം പിസ്സ കഴിക്കണം എന്ന് മീരാബായ് മറുപടി പറഞ്ഞത്.
