ചണ്ഡീഗഡ് : ടോക്കിയോ ഒളിമ്പിക്‌സിൽ മെഡൽ നേടിയ ഗുസ്തി താരം രവി കുമാർ ദാഹിയയ്ക്ക് പാരിതോഷികം പ്രഖ്യാപിച്ച് ഹരിയാന സർക്കാർ. ഒളിമ്പിക്‌സിൽ വെള്ളി മെഡൽ നേടിയ രാജ്യത്തിന്റെ അഭിമാന താരത്തിന് നാല് കോടി രൂപ സമ്മാനമായി നൽകുമെന്ന് ഹരിയാന മുഖ്യമന്ത്രി മനോഹർ ലാൽ ഖട്ടാർ പ്രഖ്യാപിച്ചു. ഇത് കൂടാതെ താരത്തിന് എ ക്ലാസ് സർക്കാർ ജോലിയും നൽകും.
ഹരിയാനയിലെ ജനങ്ങളുടെ മാത്രമല്ല രാജ്യത്തെ കോടിക്കണക്കിന് ആളുകളുടെ ഹൃദയവും രവി ദാഹിയ കവർന്നു എന്നാണ് മുഖ്യമന്ത്രി മനോഹർ ലാൽ ഖട്ടാർ പറഞ്ഞത്. നിരവധി പേരാണ് ദാഹിയയ്ക്ക് അഭിനന്ദങ്ങൾ അറിയിച്ചുകൊണ്ട് രംഗത്തെത്തിയിരിക്കുന്നത്. താരത്തിന് ഇനിയും ഉയരങ്ങളിൽ എത്താൻ സാധിക്കട്ടെയെന്നും മുഖ്യമന്ത്രി ആശംസിച്ചു. ഇതിന് പിന്നാലെയാണ് താരത്തിന് സർക്കാർ പാരിതോഷികം നൽകുമെന്ന് അദ്ദേഹം അറിയിച്ചത്.
രാജ്യത്തിന് വെള്ളി മെഡൽ നേടി തന്നതിന് പാരിതോഷികമായി രവി കുമാർ ദാഹിയയ്ക്ക് സംസ്ഥാന സർക്കാർ 4 കോടി രൂപ നൽകുമെന്ന് അദ്ദേഹം പറഞ്ഞു. ഇത് കൂടാതെ ദാഹിയയ്ക്ക് ഹരിയാനയിൽ എവിടേയും പകുതി വിലയ്‌ക്ക് സ്ഥലം വാങ്ങാനും സർക്കാർ അനുമതി നൽകും. ദാഹിയയുടെ സ്വന്തം ഗ്രാമമായ നഹാരിയിൽ ഗുസ്തി സ്റ്റേഡിയം പണിയുമെന്നും മനോഹർ ഖട്ടാർ ഉറപ്പുനൽകി. ഒളിമ്പിക്‌സ് ഗുസ്തിയിൽ രാജ്യത്തിന് ലഭിക്കുന്ന രണ്ടാം മെഡലാണിത്.
