കൊച്ചി: വെള്ളിത്തിരയിൽ അൻപത് വർഷങ്ങൾ പൂർത്തിയാക്കുന്ന മമ്മൂട്ടിയ്ക്ക് ആശംസകൾ നേർന്ന് പ്രിയതാരം മോഹൻലാൽ. മമ്മൂട്ടിയ്ക്കൊപ്പം 55 സിനിമകളിൽ ഒരുമിച്ച് അഭിനയിച്ചതിൽ അഭിമാനം തോന്നുവെന്നും ഇനിയും ഒരുപാട് സിനിമകളിൽ ഒന്നിച്ച് അഭിനയിക്കണമെന്നും താരം ഫേസ്ബുക്കിൽ കുറിച്ചു.
മോഹൻലാലിന്റെ കുറിപ്പ് ഇങ്ങനെ ‘ ഇന്നെന്റെ സഹോദരൻ സിനിമയിൽ മഹത്തരമായ അൻപത് വർഷങ്ങൾ പൂർത്തിയാക്കുകയാണ്. അദ്ദേഹത്തോടൊപ്പം 55 സിനിമകളിൽ അഭിനയിക്കാൻ സാധിച്ചതിൽ അഭിമാനം തോന്നുന്നു. ഇനിയും മുന്നോട്ട് ധാരാളം സിനിമകൾ ചെയ്യണം, എല്ലാ ആശംസകളും നേരുന്നു ഇച്ചാക്കാ…’ മോഹൻലാൽ കുറിച്ചു. മോഹൻലാലിന്റെ ആശംസയ്ക്ക് നന്ദി അറിയിച്ച് മമ്മൂട്ടിയും എത്തി. താങ്ക് യു ഡിയർ ലാൽ എന്നാണ് താരം കുറിച്ചത്.
പടയോട്ടത്തിലൂടെയാണ് മമ്മൂട്ടി മോഹൻലാൽ കൂട്ടുകെട്ട് വെള്ളിത്തിരയിൽ തുടക്കം കുറിക്കുന്നത്. പാവം പൂർണ്ണിമ, എന്തിനോ പൂക്കുന്ന പൂക്കൾ, അങ്ങാടിക്കപ്പുറത്ത്, അവിടത്തെ പോലെ ഇവിടെയും, നമ്പർ 20 മദ്രാസ് മെയിൽ, വാർത്ത, ഹരികൃഷ്ണൻസ്, ട്വന്റി -20, എന്നിങ്ങനെ നിരവധി സിനിമകളിൽ ഇരുവരും ഒരുമിച്ച് അഭിനയിച്ചിട്ടുണ്ട്.
Today, my brother completes 50 glorious years in the film industry. I feel so proud to have shared the screen with him in 55 memorable films and looking forward to many more. Congratulations Ichakka!
Posted by Mohanlal on Friday, August 6, 2021
