തിരുവനന്തപുരം : ഈശോ സിനിമയുടെ പേരുമായി ബന്ധപ്പെട്ട വിവാദങ്ങളിൽ വീണ്ടും പ്രതികരിച്ച് സംവിധായകൻ നാദിർഷാ. പേര് സ്വന്തം ഇഷ്ടപ്രകാരം ഇട്ടതല്ലെന്ന് നാദിർഷ പറഞ്ഞു. സിനിമയ്‌ക്കെതിരെ പ്രതിഷേധം ശക്തമാകുന്നതിനിടെയാണ് വീണ്ടും പ്രതികരണവുമായി നാദിർഷ രംഗത്ത് എത്തിയത്.
സിനിമയുടെ പേര് മാറ്റേണ്ട സാഹചര്യമില്ല. നിർമ്മാതാവിന്റെയും, നായകന്റെയുമെല്ലാം അഭിപ്രായം ആരാഞ്ഞ ശേഷമാണ് അന്തിമ തീരുമാനം എടുത്തത്. ഇതിന് മുൻപും സമാന പേരുകളിൽ സിനിമകൾ ഇറക്കിയിട്ടുണ്ട്. അന്നൊന്നും വിവാദം ഉണ്ടായിട്ടില്ലെന്നും നാദിർഷ പറഞ്ഞു.
നേരത്തെ ക്രിസ്തീയ മതവിശ്വാസത്തെ വ്രണപ്പെടുത്തുന്നുവെന്ന തരത്തിലാണ് ചിത്രത്തിന്റെ പേരെന്ന് ആരോപിച്ചാണ് ഒരു വിഭാഗം സിനിമയുടെ പേര് മാറ്റണമെന്ന് ആവശ്യപ്പെടുന്നതെന്ന് നാദിർഷ നേരത്തെ പറഞ്ഞിരുന്നു. താൻ ഏറെ ബഹുമാനിക്കുന്ന ദൈവ പുത്രനാണ് ജീസസ്. ഈ സിനിമയ്‌ക്ക് ജീസസുമായി യാതൊരു ബന്ധവുമില്ലെന്നും അദ്ദേഹം വ്യക്തമാക്കിയിരുന്നു.
സിനിമയുടെ പേര് മാറ്റണമെന്ന് ആവശ്യപ്പെട്ട് ശക്തമായ പ്രതിഷേധമാണ് ഉയരുന്നത്. ഇതേ തുടർന്ന് മോഷൻ പോസ്റ്ററിൽ നിന്നും നോട്ട് ഫ്രം ബൈബിൾ എന്ന ടാഗ് ലൈൻ മോഷൻ പോസ്റ്ററിൽ നിന്നും ഒഴിവാക്കിയിരുന്നു.
