ന്യൂഡൽഹി: 75-ാം സ്വാതന്ത്ര്യ ദിനാഘോഷത്തിനായി ബിഗ് ബി യും ഇന്ത്യയുടെ വാനമ്പാടിയും ഒത്തുച്ചേരുന്ന സംഗീത ആൽബം പുറത്തിറങ്ങുന്നു. ഹം ഹിന്ദുസ്ഥാനി എന്ന പേരിലാണ് ആൽബം.
ബോളിവുഡ് ഇതിഹാസം അമിതാഭ് ബച്ചനും ഹിന്ദി ചലചിത്ര പിന്നണി ഗായിക ലതാ മങ്കേഷ്കറും വർഷങ്ങളുടെ ഇടവേളക്കുശേഷം ഒന്നിച്ചു പ്രവർത്തിക്കുന്നു എന്ന പ്രത്യേകതയും ഹം ഹിന്ദുസ്ഥാനിക്കുണ്ട്. ഓഗസ്റ്റ് 13 ന് ആൽബം പുറത്തിറക്കാനുള്ള തയ്യാറെടുപ്പിലാണ് അണിയറ പ്രവർത്തകർ. പ്രയങ്ക് ശർമ്മയും പരാസ് മെഹ്ത്തയും ചേർന്നാണ് നിർമ്മാണം. ധമാക്ക റെക്കോർഡ്സ് വിപണിയിലെത്തിക്കും.
രാജ്യത്തോടും ലോകത്തോടുമുള്ള ഇന്ത്യക്കാരുടെ വികാരങ്ങൾ പ്രതിധ്വനിക്കുന്നതാവും ആൽബത്തിന്റെ ഉള്ളടക്കമെന്ന് നിർമ്മാതാക്കൾ പറഞ്ഞു. സ്നേഹവും പ്രത്യാശയും ഒന്നിപ്പിക്കുകയും പ്രചരിപ്പിക്കുകയുമാണ് ലക്ഷ്യമെന്നും അവർ കൂട്ടിച്ചേർത്തു. പിന്നണി ഗായകൻമാരായ സോനു നിഗം, ഷാബിർ കുമാർ, ഗായിക അൽക്ക യാഗ്നിക്, ഹിന്ദി ചലചിത്ര നടി പത്മിനി കോലാപുരി എന്നിവരും ദേശ ഭക്തി ഗാനത്തിന് ശബ്ദം നൽകി.
മുതിർന്ന താരങ്ങൾക്കൊപ്പം യുവകലാകാരൻമാരും പങ്കാളികളാവുന്നുണ്ട്്. ശ്രദ്ധ കപൂർ, സോനാക്ഷി സിൻഹ, ശ്രുതി ഹാസൻ, താര സുതാരിയ, അങ്കിത് തിവാരി, സിദ്ധാന്ത് കപൂർ, ജന്നത്ത് സുബേർ എന്നിവരും അണിനിരക്കുന്നു.
Comments