ന്യൂഡൽഹി: ദീനദയാൽ അന്ത്യോദയ യോജന-ദേശീയ ഗ്രാമീണ ഉപജീവന മിഷനു കീഴിൽ പ്രവർത്തിക്കുന്ന സ്വയം സഹായ സംഘങ്ങളിലെ (എസ്എച്ച്ജി) സ്ത്രീകളുമായി പ്രധാനമന്ത്രി നരേന്ദ്ര മോദി ഇന്ന് ആശയവിനിമയം നടത്തും. ഉച്ചക്ക് 12:30ന് വീഡിയോ കോൺഫറൻസിംഗിലൂടെയാണ് പ്രധാനമന്ത്രി സംവദിക്കുന്നത്.
ഇന്ത്യയിൽ ധാരാളം സ്വയം സഹായ സംഘങ്ങളുണ്ട്. സ്ത്രീ ശാക്തീകരണത്തിൽ ഈ സംഘങ്ങൾ മഹത്തായ പങ്കുവഹിക്കുന്നു. ഈ സംഘങ്ങളുടെ പ്രവർത്തന ഉന്നമനത്തിനായുള്ള പദ്ധതികളെ കുറിച്ച് ഇന്ന് അറിയിക്കും. ഇതിലൂടെ രാജ്യത്തെ മറ്റു സ്ത്രീകള്ക്ക് ഇത് പ്രചോദനമാകുമെന്നും പ്രധാനമന്ത്രി ട്വിറ്ററിൽ കുറിച്ചു.
രാജ്യത്തെ വിവിധ സംഘങ്ങളുടെ പ്രവർത്തന മികവിനെ കുറിച്ചും അവരുടെ വിജയ കഥകളും ഇന്ന് ചർച്ച ചെയ്യും. കാർഷിക ഉപജീവനമാർഗ്ഗങ്ങളുടെ സാമാന്യാശയത്തെക്കുറിച്ചുള്ള കൈപ്പുസ്തകവും ഇതിനൊപ്പം ഇന്ന് പുറത്തിറക്കും.
പരിപാടിയുടെ ഭാഗമായി 4 ലക്ഷത്തോളം വരുന്ന സ്വയം സഹായ സംഘങ്ങൾക്കുവേണ്ടി 1,625 കോടി രൂപ ധന സഹായം നൽകും. കൂടാതെ ഭക്ഷ്യസംസ്‌കരണ വ്യവസായ മന്ത്രാലയത്തിനു കീഴിൽ നിന്നും പ്രധാനമന്ത്രി ഫോർമലൈസെഷൻ ഓഫ് മൈക്രോ ഫുഡ് പ്രൊസസിംഗ് എന്റർപ്രൈസിന്റെ (പിഎംഎഫ്എംഇ) ഭാഗമായി 7,500 എസ്എച്ച്ജികൾക്കായി 25 കോടി രൂപ പ്രാരംഭ മൂലധനമായി നൽകും. 75 കർഷക ഉത്പാദക സംഘടനക്കായി( എഫ്പിഒ) 4.13 കോടി രൂപയും ഇതിനൊപ്പം നൽകും.
