മുംബൈ: ഇലക്ട്രിക് യുഗത്തിലേക്കുള്ള യാത്രയിൽ ഒരു അതിഥിയെ കൂടി അവതരിപ്പിച്ച് ടാറ്റ. സെഡാനായ ടിഗോറിന്റെ ഇലക്ട്രിക് വേരിയെന്റാണ് ടാറ്റ പുറത്തിറക്കിയിരിക്കുന്നത്. ടിഗോർ ഇവി എന്ന് പേരിട്ടിരിക്കുന്ന വാഹനം ഈ മാസം 31 മുതൽ വിപണിയിലെത്തും. നെക്സണിന് ശേഷെ ടാറ്റ വിപണിയിലേക്ക് എത്തിക്കുന്ന ഇലക്ട്രിക് വാഹനമാണ് ടിഗോർ ഇവി. നെക്സണിലേതിന് സമാനമായ സിപ്ട്രൺ സാങ്കേതികവിദ്യ തന്നെയാണ് ടിഗോർ ഇവിയിലും ഉപയോഗിച്ചിരിക്കുന്നത്.
55 കിലോ വാട്ടിന്റെ ഇലക്ട്രിക് മോട്ടോറാണ് വാഹനത്തിന് നൽകിയിരിക്കുന്നത്. ലിഥിയം അയൺ ബാറ്ററിയാണ് ടിഗോർ ഇവിയിലുള്ളത്. ഫുൾ ചാർജിൽ ഏകദേശം 250 കിലോമീറ്റർ റേഞ്ചാണ് പ്രതീക്ഷിക്കുന്നത്. ഫാസ്റ്റ് ചാർജിംഗിലൂടെ ഒരു മണിക്കൂർ സമയം കൊണ്ട് 80 ശതമാനം വരെ ചാർജ് ചെയ്യാൻ സാധിക്കും. നോർമൽ ചാർജിംഗ് ആണെങ്കിൽ 100 ശതമാനം ചാർജ് ആവാൻ 8.5 മണിക്കൂർ സമയമെടുക്കും.
വാഹനത്തിന്റെ രൂപഭാവങ്ങളിലും മാറ്റങ്ങൾ വരുത്തിയാണ് ടിഗോർ ഇവി അവതരിപ്പിച്ചിരിക്കുന്നത്. പുതിയ ഹെഡ്ലാമ്പുകള്, ട്രൈ-ആരോ ഡിസൈന് ഉള്ള പുതിയ ഫ്രണ്ട് ഗ്രില്, പുനര്രൂപകല്പ്പന ചെയ്ത ടെയില്ലാമ്പുകള്, പുതിയ അലോയ് വീലുകള് തുടങ്ങിയവയാണ് പ്രത്യേകതകൾ. ഇതിനൊപ്പം നെക്സൺ ഇവിയിൽ നൽകിയിരിക്കുന്നതിന് സമാനമായ ബ്ലൂ ലൈനിംഗുകളും ടാറ്റ നൽകിയിട്ടുണ്ട്.
