ജമ്മു കശ്മീരിൽ വീണ്ടും ഏറ്റുമുട്ടൽ ; ഭീകരനെ സുരക്ഷാ സേന വധിച്ചു

ശ്രീനഗർ : ജമ്മു കശ്മീരിൽ ഭീകരനെ വധിച്ച് സുരക്ഷാ സേന. അവന്തിപ്പോരയിലുണ്ടായ ഏറ്റുമുട്ടലിൽ രാവിലെയോടെയാണ് ഭീകരനെ വധിച്ചത്. മേഖലയിൽ ഏറ്റുമുട്ടൽ തുടരുകയാണ്.

പാംപോരിലെ ഖ്രീ മേഖലയിൽ പുലർച്ചെയോടെയാണ് ഏറ്റുമുട്ടൽ ആരംഭിച്ചത്. മേഖലയിൽ ഭീകരർ ഒളിച്ചിരിക്കുന്നതായി അവന്തിപ്പോര പോലീസിന് രഹസ്യവിവരം ലഭിച്ചിരുന്നു. ഇതേ തുടർന്ന് പരിശോധനയ്‌ക്കെത്തിയ ഉദ്യോഗസ്ഥർക്കെതിരെ ഭീകരർ വെടിയുതിർത്തതോടെയാണ് ഏറ്റുമുട്ടൽ ആരംഭിച്ചത്. പോലീസിന്റെയും സിആർപിഎഫിന്റെയും സംയുക്ത സംഘമാണ് പരിശോധനയ്‌ക്കായി എത്തിയത്.

തുടർച്ചയായ രണ്ടാം ദിവസമാണ് ജമ്മു കശ്മീരിൽ ഏറ്റുമുട്ടലിൽ ഭീകരനെ വധിക്കുന്നത്. കഴിഞ്ഞ ദിവസം രജൗരിയിലുണ്ടായ ഏറ്റുമുട്ടലിൽ ഭീകരനെ വധിച്ചിരുന്നു.