വിനയൻ സംവിധാനം ചെയ്യുന്ന ചിത്രമായ ‘പത്തൊൻപതാം നൂറ്റാണ്ടിൽ’ലെ രണ്ടാമത്തെ ക്യാരക്ടർ പോസ്റ്റഡ പുറത്തിറങ്ങി. സുദേവ് നായർ അവതരിപ്പിക്കുന്ന പടവീടൻ നമ്പിയെന്ന കഥാപാത്രത്തിന്റെ പോസ്റ്ററാണ് പുറത്തിറങ്ങിയിരിക്കുന്നത്. ചിത്രത്തിന്റെ സംവിധായകൻ വിനയൻ തന്നെയാണ് പോസ്റ്റർ പുറത്തിറക്കിയത്. ആറാട്ടുപുഴ വേലായുധപ്പണിക്കരുടെ കഥ പറയുന്ന ചിത്രത്തിൽ സിജു വിൽസണാണ് കേന്ദ്ര കഥാപാത്രമായി എത്തുന്നത്.
പോസ്റ്റർ പുറത്തിറക്കിക്കൊണ്ടുള്ള സംവിധായകന്റെ പോസ്റ്റ് ഇങ്ങനെ:-
“സുദേവ് നായർ അവതരിപ്പിക്കുന്ന കഥാപാത്രം പടവീടൻ നമ്പി തിരുവാതാംകൂർ സേനയിലെ രണ്ടാം പടനായകനാണ്.. തൻെറ അധികാരത്തിൻെറ ഗർവ്വ് സാധാരണക്കാരൻെറ പുറത്ത് അടിച്ചേൽപ്പിക്കാൻ ശ്രമിക്കുന്ന ചില ഉദ്യോഗസ്ഥരുടെ താൻപ്രമാണിത്വം ഏതു കാലഘട്ടത്തിലും ഉള്ളതാണല്ലോ? തീണ്ടലും തൊടീലും ഒക്കെ നില നിന്നിരുന്ന പത്തൊൻപതാം നൂറ്റാണ്ടിൻെറ മദ്ധ്യ കാലത്ത് ജീവിച്ച അത്തരം ഒരു പട്ടാള മേധാവി ആയിരുന്നു പടവീടൻ നമ്പി…
പക്ഷേ അയാളുടെ അഹങ്കാരത്തെയും ഔദ്യോഗിക ഗർവ്വിനേയും തെല്ലു പോലും കൂസാതെ എതിരിട്ടു നിന്ന താണ ജാതിയിൽ പെട്ട ഒരു പോരാളി അന്നുണ്ടായിരുന്നു…അതാണ് ആറാട്ടു പുഴ വേലായുധപ്പണിക്കർ… അധികാരത്തിൻെറ ശക്തികൊണ്ടും അസാമാന്യ കായികബലം കൊണ്ടും ആരോടും ആജ്ഞാപിച്ചു മാത്രം ശീലിച്ച ഒരു അസാധാരണ വ്യക്തി ആയിരുന്നു പടവീടൻ നമ്പി.. നമ്പിയും വേലായുധനും തമ്മിൽ ഏറ്റു മുട്ടിയപ്പോഴൊക്കെ ഒരു യുദ്ധകാഹളം അന്നാട്ടിൽ മുഴങ്ങിയിരുന്നു…
സുദേവ് അതിമനോഹരമാക്കിയിരിക്കുന്നു പടവീടൻ നമ്പിയേ….”
