റോം: ഇറ്റലിയിലെ പുരാതന പ്രദേശത്തെ വീടിനായി നിങ്ങൾ ചിലവാക്കേണ്ടത് വെറും 87 രൂപ മാത്രം. ജനങ്ങൾ അന്തംവിടുന്ന വിലക്കുറവ് യാഥാർത്ഥ്യമാണ്. മായെൻസയെന്ന പൗരാണിക നഗരത്തിലെ മേയറാണ് വാഗ്ദാനം നൽകുന്നത്. ഗ്രാമീണമേഖലകളിൽ നിന്ന് കുടുംബങ്ങൾ കൂട്ടത്തോടെ നഗരങ്ങളിലേക്ക് ചേക്കേറുന്നതാണ് അധികൃതരെ വേറിട്ട രീതിയിൽ ചിന്തിപ്പിച്ചത്. പൗരാണിക ഗോത്രവർഗ്ഗങ്ങളുടെ കേന്ദ്രമായിരുന്ന പ്രദേശം ഏതാണ്ട് ആളൊഴിഞ്ഞ തരത്തിലാവുന്നത് തടയലാണ് ഉദ്ദേശം. മേയർ ക്ലൗഡിയോ പെർദ്യൂതിയാണ് വൻ സൗജന്യം പ്രഖ്യാപിച്ചത്.
വീട് ഏകദേശം ഒരു യൂറോയ്ക്കാണ് ലഭിക്കുക. സാധാരണഗതിയിൽ മക്ഡൊണാൾഡിന്റെ ഒരു ബർഗർ പോലും ആ രൂപയ്ക്ക് കിട്ടില്ലെന്നതാണ് സത്യമെന്ന് ഇറ്റലിക്കാർ തന്നെ പറയുന്നു. എന്നാൽ 87 രൂപയ്ക്ക് വാങ്ങുന്ന വീട് ഉടമസ്ഥർ അതിന്റെ പൗരാണികത നഷ്ട്ടപെടുത്താതെ പുനരുദ്ധരിക്കാൻ തയ്യാറാകണമെന്നതാണ് ഏക നിബന്ധന. വീട് വാങ്ങുന്നവർ അവിടെ സ്ഥിരം താമസിക്കണമെന്ന നിബന്ധനയുമില്ല. എന്നാൽ എങ്ങിനെയാണ് വീട് ഉപയോഗിക്കാനുദ്ദേശിക്കുന്നതെന്ന കൃത്യമായ പദ്ധതി തയ്യാറാക്കി നൽകണം. വീടായും റസ്റ്റോറന്റായും കടകളായും ഉപയോഗിക്കാം. ഇതിനായി നഗരസഭയിൽ മുൻകൂറായി നാലരലക്ഷം രൂപ കെട്ടിവയ്ക്കണമെന്നതും നിബന്ധനയിലുണ്ട്. വീടിന്റെ സംരക്ഷണം ഉറപ്പുവരുത്താനാണ് തുക ഈടാക്കുന്നത്. എന്നാൽ ഈ തുക വീടിന്റെ പുനരുദ്ധാരണം തീരുന്ന മുറയ്ക്ക് തിരികെ നൽകുമെന്നും മേയർ വ്യക്തമാക്കുന്നു.
സമുദ്രതീരത്തെ മലമുകളിലേക്ക് കയറിനിൽക്കുന്ന തരത്തിൽ അതിസുന്ദര നിർമ്മിതികളാണ് മായെൻസയിലേത്. ഇറ്റലിയുടെ തലസ്ഥാനഗരമായ റോമിൽ നിന്ന് 70 കിലോമീറ്റർ മാത്രം ദൂരത്താണ് മായെൻസ എന്നതും ആകർഷണീയത വർദ്ധിപ്പിക്കുന്ന ഘടകമാണ്. അടിസ്ഥാന സൗകര്യങ്ങളുടെ കുറവും സ്ഥിരം നഗരത്തിൽ പോകാൻ സാധിക്കില്ലെന്നതും പുതുതലമുറയെ ഗ്രാമത്തിൽ നിന്നും അകറ്റുകയാണ്. പഴയ തലമുറ നഗരസഭയ്ക്ക് വീടുകൾ കൈമാറിയിട്ടാണ് പോകുന്നത്. വെബ് സൈറ്റ് വഴിയാണ് വിൽപ്പന. 100 വീടുകളാണ് നിലവിൽ ആരും ശ്രദ്ധിക്കാനില്ലാതെ കിടക്കുന്നത്. എന്നാൽ ഇനിയും വീടുകളുടെ ഒഴിവുണ്ടാകുമെന്നാണ് മേയർ പറയുന്നത്.
Comments