ടോക്കിയോ : പാരലിമ്പിക്സിലെ മെഡൽ നേട്ടം വെള്ളിയിലേക്ക് ഒതുങ്ങിയതിൽ നിരാശയുണ്ടെന്ന് വെള്ളിമെഡൽ ജേതാവ് ഭാവിന ബെൻ പട്ടേൽ. മെഡൽ നേട്ടത്തിൽ സന്തോഷമുണ്ടെന്നും ഭാവിന പറഞ്ഞു. ദേശീയ മാദ്ധ്യമത്തോടായിരുന്നു താരത്തിന്റെ പ്രതികരണം.
മെഡൽ നേട്ടത്തിൽ ഒരു വശത്ത് സന്തോഷവും മറുവശത്ത് നിരാശയും ഉണ്ട്. കഴിവിന്റെ നൂറ് ശതമാനവും പ്രകടിപ്പിക്കാൻ കഴിഞ്ഞില്ല. മത്സരത്തിനിടെ ആശങ്കയുണ്ടായിരുന്നു. മത്സരത്തിൽ തൃപ്തയല്ല. മാത്രമല്ല നിരാശയുമുണ്ട്. അടുത്ത മത്സരത്തിൽ ഇപ്പോഴുണ്ടായ പോരായ്മകളെല്ലാം തിരുത്തുമെന്നും ഭാവിന വ്യക്തമാക്കി.
പരമാവധി കഴിവ് തെളിയിക്കാൻ ശ്രമിച്ചെങ്കിലും സാധിച്ചില്ല. കുച്ചുകൂടി പരിശ്രമിച്ചിരുന്നെങ്കിൽ ഉറപ്പായും സ്വർണം നേടാൻ സാധിക്കുമായിരുന്നു. ചൈനീസ് താരത്തെ തോൽപ്പിച്ച് സ്വർണ മെഡൽ സ്വന്തമാക്കാൻ സാധിക്കുമെന്ന ആത്മവിശ്വാസം ഉണ്ടായിരുന്നു. എന്നാൽ മത്സരത്തിനിടെ ചിന്തകളെ നിയന്ത്രിക്കാനായില്ല. അതുകൊണ്ടുതന്നെ സമ്മർദ്ദത്തിലായിരുന്നു. ഞാൻ പ്രതീക്ഷിച്ച രീതിയിലല്ല മത്സരിച്ചതെന്നും കായിക താരം വ്യക്തമാക്കി.
വെള്ളിമെഡൽ നേട്ടത്തിൽ ഭാവിന കുടുംബാംഗങ്ങൾക്ക് നന്ദി പറഞ്ഞു. മെഡൽ തന്നെ പിന്തുണയ്ക്കുന്നവർക്കും, രാജ്യത്തിനും സമർപ്പിക്കുന്നു. നേട്ടത്തിൽ പരിശീലകന് പ്രത്യേകം നന്ദി പറയുന്നുവെന്നും താരം കൂട്ടിച്ചേർത്തു.
